سفاک ڈاکوؤں نے بیٹی اور بیوی کے سامنے نوجوان کو قتل کردیا



کراچی (اسٹاف رپورٹر)گلستان جوہر کے علاقے میں سفاک ملزموں نے معصوم بیٹی اور بیوی کے سامنے ایک نوجوان کو فائرنگ کرکے ہلاک کردیا۔ تفصیلات کے مطابق گلستان جوہر بلاک 16/ میں ایک موٹر سائیکل پر 30/ سالہ ضیاء اللہ طارق ہاشمی اپنی اہلیہ اور تین سالہ تنظیم فاطمہ اور ایک تین سالہ بیٹے کے ہمراہ شادی کی تقریب سے واپس آرہا تھا اسی دوان مسلح موٹر سائیکل سواروں نے انہیں روک کر ضیاء اللہ سے نقدی، موبائل فون، چوڑیاں دیگر زیورات چھین لئے، اس کے بعد ملزمان موٹر سائیکل کی ٹنکی پر بیٹھی ہوئی بچی کے کانوں سے بالیاں نوچنے لگے تو وہ اتر نہیں رہی تھیں جس پر ملزمان نے اس کی بالیاں کھینچ لیں جس سے بچی نے چیخ ماری اس موقع پر بچی کا باپ تلملا اٹھا اور اس نے مزاحمت کی جس پر مسلح افراد نے فائرنگ کردی جس سے ایک گولی تنظیم فاطمہ اور دوسری اس کے والد کے سینے پر لگی اور وہ موقع پر ہلاک ہوگیا اس واقعہ کے بعد مقتول کی اہلیہ حواس باختہ ہوگئی۔ مقتول گلستان جوہر کا رہائشی تھا اس افسوسناک واقعہ کی خبر جب اس کے گھر پہنچی تو وہاں کہرام مچ گیا علاقے کے لوگوں کی بڑی تعداد جمع ہوگئی، مقتول نجی ٹی وی کے فنانس ڈیپارٹمنٹ میں ملازم تھا، پولیس نے نامعلوم ملزمان کے خلاف مقدمہ درج کرلیا ہے۔