سندھ میں حکومت سازی: ایم کیو ایم اور پیپلزپارٹی کو قریب لانے کی کوششیں
کراچی (راجہ طارق…اسٹاف رپورٹر) عام انتخابات کے نتائج کے اعلان کے بعد حکومت سازی کی کوششیں تیز ہوگئی ہیں اورمقتدر قوتوں نے سندھ میں حکومت سازی میں ایم کیوایم کی شمولیت کے لئے کوششیں شروع کردی ہیں ۔ سندھ میں پیپلزپارٹی ایک مرتبہ پھر بڑی جماعت کے طورپر سامنے آئی ہے جبکہ متحدہ قومی موومنٹ نے اپنی سابقہ پوزیشن برقرار رکھی ہے۔ سندھ میں دوسرے صوبوں سے صورتحال مختلف ہے اور پیپلزپارٹی کو حکومت سازی کے لئے کسی دوسری جماعت کی ضرورت نہیں ہے اس لئے سندھ میں حکومت سازی کے لئے پیپلزپارٹی اور دیگر جماعتوں میں مذاکرات کی نوعیت بھی دوسرے صوبوں سے مختلف ہوگی۔ پیپلزپارٹی کے ذرائع کے مطابق پیپلزپارٹی کی خواہش ہے کہ سندھ میں ایسی مستحکم حکومت قائم کی جائے جو صوبے کے عوام کی بہتر خدمت کرسکے۔ ذرائع کے مطابق سندھ میں پیپلزپارٹی اگرچہ اس پوزیشن میں آگئی ہے کہ وہ اکیلے حکومت بنائے تاہم مستحکم حکومت کے لئے ہم خیال جماعتوں سے رابطے جاری ہیں۔ ذرائع کے مطابق آئندہ حکومت میں پیپلزپارٹی، عوامی نیشنل پارٹی، نیشنل پیپلزپارٹی کو اپنے ساتھ حکومت میں شامل کرنے کا ارادہ رکھتی ہے جبکہ پیپلزپارٹی کے بعض حلقوں کی رائے ہے کہ آئندہ حکومت میں سندھ کی د وسری بڑی طاقت متحدہ قومی موومنٹ کو شامل کیا جائے تاکہ ایک مستحکم حکومت پرامن ماحول میں کام کرسکے اس سلسلے میں بعض مقتدر قوتیں کوششیں کررہی ہیں تاکہ پیپلزپارٹی اور متحدہ قومی موومنٹ کو قریب لایا جاسکے حکومت سازی کے ساتھ ساتھ آئندہ وزیر اعلیٰ کے لئے بھی بھاگ دوڑ شروع ہوگئی۔ ذرائع کے مطابق صوبے کے آئندہ وزیر اعلیٰ کے لئے پیپلزپارٹی سندھ کے صدر سید قائم علی شاہ کے علاوہ ڈاکٹر ذوالفقار مرزا، آغا سراج درانی، منظور وسان اور پیر مظہرالحق مضبوط امیدوار ہیں جبکہ ذوالفقار مرزا اگر وزیر اعلیٰ نہ ہوسکے تو ان کا نام وزیرداخلہ سندھ کے لئے بھی زیر غور ہے اس طرح پیر مظہرالحق کے نام پر وزیر اعلیٰ کے ساتھ اسپیکر سندھ اسمبلی کے لئے غور کیا جارہا ہے تا ہم آئندہ وزیر اعلیٰ کا حتمی فیصلہ پارٹی قیادت پارٹی رہنماؤں کے مشورے سے کرے گی۔

__________________