سندھ ٹیکسٹ بورڈ کا اکاؤنٹ منجمد، چھپائی کے ٹھیکے منسوخ کردیئے گئے



کراچی (اسٹاف رپورٹر) صوبائی محکمہ تعلیم نے سندھ ٹیکسٹ بک بورڈ کا اکاؤنٹ منجمد کردیا ہے اور کاغذ کی خریداری اور کتابوں کی چھپائی کیلئے دیئے گئے ٹھیکے بھی منسوخ کردیئے ہیں جس کی وجہ سے درسی کتابوں کی وقت پر اشاعت مشکل ہوگئی ہے۔ محکمہ تعلیم کے ایک اعلیٰ افسر نے تصدیق کی ہے کہ سندھ ٹیکسٹ بک بورڈ کا اکاؤنٹ منجمد کرنے کے احکامات جاری کردیئے گئے ہیں اور معاملات کی تحقیقات کرائی جارہی ہے۔ انہوں نے کہا کہ حالیہ ہنگاموں میں سندھ ٹیکسٹ بورڈ جامشورو کا سارا ریکارڈ جل گیا ہے لہٰذا رقم کے غلط استعمال سے بچنے کیلئے یہ اقدام کیا گیا ہے۔ چند روز کے اندر تحقیقات مکمل ہونے کے بعد اکاؤنٹ بحال کردیا جائے گا۔ اس کے علاوہ تعلیمی سال چونکہ اپریل کردیا گیا ہے لہٰذا وقت پر کتابیں لانے کیلئے کسی ماہر شخص کی بطور چیئرمین بورڈ میں تقرری بھی خارج از امکان نہیں۔