سندھ کی خراب ترین صورتحال پرگورنر مستعفی ہوجائیں، شاہ فرید الحق



کراچی (اسٹاف رپورٹر) جمعیت علمائے پاکستان کی سپریم کونسل کے چیئرمین پروفیسر سید شاہ فرید الحق نے کہا ہے کہ سندھ کی خراب ترین صورتحال پر گورنر سندھ استعفیٰ دیدیں، اہالیان سندھ کو 8 سالوں میں صرف امن بھی نہیں مل سکا۔ یہ بات انہوں نے جے یو پی صوبہ سندھ کے سیکریٹری جنرل محمد ہاشم صدیقی ایڈووکیٹ سے گفتگو کرتے ہوئے کہی۔ انہوں نے کہا کہ اب تو صوبہ سندھ کے عوام بدترین معیشت، مہنگائی اور بیروزگاری کے مطالبے کو چھوڑ کر صرف امن کی تلاش کر رہے ہیں جو موجودہ گورنر، حکومت سندھ اور بالخصوص پرویز مشرف کا سیاہ کارنامہ ہے۔ انہوں نے کہا کہ روز روز کی فائرنگ، ہنگامے، قتل وغارت گری اور بم دھماکوں نے کراچی، حیدرآباد سندھ اور پاکستان بھرکے عوام کو نفسیاتی مریض بنادیا ہے۔ پروفیسر سید شاہ فرید الحق نے کہا کہ کراچی کے عوام کو نام نہاد ترقیاتی منصوبوں اور فوٹو سیشن کے ذریعے بے وقوف بنانے کا عمل اب بند ہونا چاہیے۔ انہوں نے کہا کہ جرائم پیشہ مسلح دہشت گرد دندناتے پھر رہے ہیں مگر حکومت کے کسی ایک بھی ذمہ دار نے استعفیٰ دینے کی جرأت نہیں کی۔ وزیراعلیٰ، گورنر اور سٹی ناظم خود محصور ہوگئے ہیں اور عوام کو دکانیں کھولنے اور معمولات زندگی رواں رکھنے پر مجبور کر رہے ہیں، انہوں نے کہا کہ پاکستان تباہی کے دہانے پر کھڑا ہے اور اس کا ذمہ دار حکمرانوں کا ٹولہ ہے جو 50 سال تک صرف اپنی بادشاہت قائم رکھنا چاہتا ہے۔ جھوٹے دعوؤں، جھوٹی تسلیاں اور ترقی کے جھوٹے اعدادوشمار سے عوام کا پیٹ بھرنے کی کوشش کی جا رہی ہے جبکہ سندھ بھر میں سیکورٹی فورسز اور حکومت کی رٹ کا کوئی وجود نہیں ہے، انہوں نے کہا کہ افواہیں پھیلا کر ہنگامہ آرائی اور بعدازاں انتخابات کے التواء کا جواز پیدا کیا جا رہا ہے۔