سوات، مینگورہ (نمائندہ جنگ/یجنسیاں) سوات میں سکیورٹی فورسز کے گن شپ ہیلی کاپٹروں سے جنگجوؤں کے ٹھکانوں پر حملوں میں 10 جنگجو ہلاک ہوگئے،جبکہ فورسز اور شرپسندوں میں خونریز لڑائی جاری ہے،فورسز کی کارروائی سے جنگجو ٹھکانے منتقل کرنے پر مجبور ہو گئے،حکومتی دستوں نے اونچی عمارتوں پر مورچے قائم کر لئے ہیں،کشیدہ صورتحال کے باعث علاقے میں بازار بند ہیں،جبکہ مولانا فضل اللہ کے نائب نے ایف ایم کی نشریا ت کا دوبارہ آغاز کر دیا ہے۔تفصیلات کے مطابق ڈی جی آئی ایس پی آر میجر جنرل وحید ارشد نے جیو اور اے ایف پی کو بتایا کہ کارروائی منگلو کے علاقے میں کی گئی۔ جہاں مزاحمت کاروں نے ٹھکانے بنا رکھے ہیں اور وہ پہاڑیوں سے فورسز پر حملے کرتے ہیں۔ انہوں نے مزید کہا کہ 10 افراد کی ہلاکت کی خبر رہی ہیں۔ ہمیں ان افراد کیخلاف سخت ایکشن لینا چاہیے۔ جنہوں نے پرامن سوات کو خونی جگہ بنا دیا ہے۔ دوسری طرف جھڑپوں کے نتیجے میں ہزاروں افراد کی سوات سے منتقلی جاری ہے۔ کبل اور دوسرے علاقوں میں بازار مکمل بند ہیں۔ دوسری طرف کبل میں فورسز نے موچے بنانے شروع کر دئیے ہیں۔ کبل بازار غیر اعلانیہ کرفیو کی وجہ سے سنسان پڑا ہے۔ ادھر مولانا فضل اللہ کے نائب مولانا شاہ دوراں نے ایک روز کے بعد غیر قانونی ایف ایم ریڈیو کی نشریات پھر شروع کر دی ہیں۔ انہوں نے اپنے ساتھیوں کو مسلح اور جنگی حالت میں رہنے کا حکم دیا۔ انہوں نے کہاکہ ان کو ایک طویل جدوجہد کے لئے تیار رہنا ہوگا۔۔ چار باغ میں مقامی طالبان نے پولیس سٹیشن کا محاصرہ کر لیا۔ تاہم معززین کے سمجھانے پر انہوں نے محاصرہ ختم کر دیا۔ مانیٹرنگ سیل کے مطابق منگلور میں نقل مکانی کرتے ایک گاڑی گولہ باری کی زد میں آگئی۔ جس سے گاڑی میں سوار 2 افراد جاں بحق ہوگئے۔ دریں اثناء اتوار کے روز مٹہ تھانہ پولیس نے مٹہ تھانہ کے گیٹ کے سامنے چیک پوسٹ قائم کرنے کیلئے رکاوٹیں کھڑی کردی ہیں جبکہ پولیس ذرائع کے مطابق رکاوٹیں چیک پوسٹ کیلئے نہیں بلکہ مٹہ تھانہ کے سامنے گزرنے والی تیزرفتار گاڑیوں کیلئے لگائی گئی ہیں۔ مٹہ میں قائم مقامی طالبان کی چیک پوسٹیں برقرار ہیں اور مقامی طالبان کا گشت بھی برابر جاری ہے۔ ادھر گزشتہ شام نامعلوم مقام سے فائر کیا گیا راکٹ گولہ مقامی طالبان کی زیر قبضہ پہاڑی چوٹی کے قریب گرا، جس سے زور دار دھماکہ ہوا۔ تاہم مٹہ بریوپل نقصان سے محفوظ رہا۔ مزید برآں اے پی پی پی سے گفتگو کرتے ہوئے ہوم سیکرٹری بادشاہ گل وزیر نے کہاکہ مٹہ ، بریام، خوازہ خیلہ اور سمبٹ میں حالات خراب ہیں۔ تا ہم جلد کنٹرول میں آ جائیں گے۔ ادھر مالا کنڈ ایجنسی میں حکومت نے امن کیلئے پمفلٹ گرائے۔ جن میں حکومتی اداروں سے تعاون کا کہا گیاہے۔

__________________