سوات(نمائندہ،ایجنسیاں)ضلع سوات میں شر پسندوں کیخلاف بڑے پیمانے پر ممکنہ کارروائی کیلئے تحصیل کبل اور تحصیل مٹہ میں غیرمعینہ مدت تک کیلئے کرفیو نافذ کر دیا گیا۔ سوات میڈیا سینٹرکے ترجمان کے مطابق ضلع سوات کی تحصیل کبل اور تحصیل مٹہ کے علاقوں شیرپلم، شکردرہ، پیرکلے، بریم پل اور بریم پل سے لے کرپیورچارتک کے تمام علاقوں میں آج غیرمعینہ مدت تک کیلئے کرفیو نافذ رہے گا جبکہ مینگورہ سمیت دیگر تمام علاقوں میں صبح چھ بجے سے شام سات بجے تک کرفیومیں نرمی رہے گی۔ ذرائع کے مطابق تحصیل کبل اور تحصیل مٹہ میں ممکنہ طور پر بڑے پیمانے پر کارروائی کی غرض سے کرفیو نافذ کر دیا گیاہے اور توقع ہے کہ ان علاقوں میں ( آ ج ) بدھ کو سیکیورٹی فورسزشرپسندوں کی گرفتاری کیلئے سرچ آپریشن کریں گی۔ در یں اثناء خوازہ خیلہ میں سیکیورٹی فورسزنے جنرل کونسلر خان سردار کوگرفتارکرلیا تاہم ان کی گرفتاری کی وجوہ معلوم نہ ہوسکی۔ علاوہ ازیں پیراور منگل کی درمیانی رات تحصیل کبل کے نواحی لاقہ گل جبہ میں شرپسندوں نے سیکیورٹی فورسز کے ایک قافلے پرفائرنگ کی جس کے جواب میں سیکیورٹی فورسزنے بھی کارروائی کی جس کے بعد حملہ آور فرار ہوئے تاہم کسی جانی یا مالی نقصان کی اطلاع نہیں ملی۔