سو سے زائد مریضوں کی جان لینے والی دوا عالمی ادارہ برائے صحت نے عطیہ کی تھی۔ انکشاف

 پی آئی سی ادویات کیس میں حکومت پنجاب نے سابق ڈی جی ہیلتھ اور چیف ڈرگ انسپکٹر کو بھی معطل کر دیا جبکہ ناقص ادویات سےآج بھی 2 خواتین جاں بحق ہوگئیں جس سے اب تک مرنے والوں کی تعداد 112 ہوگئی ہے، ساتھ ہی یہ انکشاف بھی ہوا ہے کہ ادارہ امراض قلب کو یہ قاتل ادویات عالمی ادارہ صحت نے عطیہ کی تھیں، اس سلسلے میں تحقیقات کرنے والی ایف آئی اے ٹیم کے ذرائع کا کہنا ہے کہ امراض قلب کے سابق ایم ایس سلیم جعفر کا نام اس سلسلے میں آرہا ہے جو عالمی ادارے صحت کے لئے سرکاری کورآڈینیٹر تھے اور انہیں آج گرفتار بھی کیا جا چکا ہے۔ اس بارے میں تمام تر ثبوت اورریکارڈ ہونے کے باوجود کوئی اس بارے میں بات نہیں کررہا ہے کہ عالمی ادارہ صحت نے بغیر کسی تصدیق کے، مقامی کمپنی کی ادویات کیوں وصول کیں اور اگے عطیہ کردیں۔ اس بارے میں اب عدالتی تحقیقات شروع ہونے کے بعد مزید حقائق سامنے آئیں گے کہ کیا عالمی ادارہ صحت کے اہلکار بھی اس اسکینڈل میں کس حد تک شریک تھے۔. لاہور ہائی کورٹ میں اس حوالے سے پٹیشن دائر کرنے والے وکیل اظہر صدیقی کا بھی اس سلسلے میں یہی کہنا ہے کہ عدالتی تحقیقات کے بعد سب کچھ سامنے آجائے گا۔ حکومت پنجاب نے پی آئی سی سے مفت ادویات لینے والے افراد کی اموات پر جاری تحقیقات کے دوران ڈی جی صحت پنجاب اسلم چودھری اور چیف ڈرگ انسپکٹرمعظم علی کو فوری طور معطل کر دیا۔ پی آئی سی کے کیس میں پہلے ہی سیکرٹری صحت جہانزیب خان اورچیف ایگزیکٹو پی آئی سی ڈاکٹر اظہر کو او ایس ڈی بنایا جا چکا ہے جبکہ ڈائریکٹر ٹیسٹنگ لیبارٹریز مفتی عبدالسلام اور ایم ایس پی آئی سی ڈاکٹر سلیم کو معطل کیا گیا ہے۔ دوسری طرف آج مزید افراد ہلاک ہو گئے جس سےناقص ادویات سے اب تک 112 افراد موت کے منہ میں جا چکے ہیں. اس کیس کی مکمل تحقیقات کے لیے وزیراعلی پنجاب نے عدالتی تحقیقات کی بھی درخواست کر دی ہے جبکہ دوسری طرف ایف آئی اے اور صوبائی قانون نافذ کرنے والے اداروں کی ٹیمیں تحقیقات کر رہی ہیں۔ ایسے تمام مریض جنھوں نے یکم دسمبر سےدس جنوری تک ادویات حاصل کی ہیں ان کی تبدیلی کے لئے پی آئی سی میں آج بھی خصوصی کاؤنٹر ز کھلے ہیں۔ واضح رہے کہ آج لاہور کے جناح اسپتال میں وزیر اعلی کی خصوصی ٹیم نے چھاپہ مار کر بڑی تعداد میں زائد از میعاد ادویات برآمد کی تھیں، یہ ادویات بھی امریکہ اور برطانیہ کی طرف سے فراہم کی گئی تھیں تاکہ غریب مریضوں کو فراہم کی جا سکیں۔

__________________
محتاج اصلاح و دعا