سپریم کورٹ بار کو لاہور رجسٹری میں اجلاس سے روک دیا گیا



لاہور (نمائندہ جنگ) ملک میں ایمرجنسی اور پی سی او کے نفاذ کے خلاف سپریم کورٹ بار ایسوسی ایشن کو سپریم کورٹ لاہور رجسٹری میں اجلاس کرنے سے روک دیا گیا۔ سپریم کورٹ لاہور رجسٹری کی انتظامیہ نے بار روم کو تالے لگا دیئے اور وکلاء کو اندر نہ جانے دیا۔ سپریم کورٹ بار کے نائب صدر غلام نبی بھٹی اور سیکرٹری امین جاوید چودھری نے بتایا کہ سپریم کورٹ بار ایسوسی ایشن نے ایمرجنسی اور پی سی او کے خلاف وکلاء کے احتجاج کے لئے لائحہ عمل پر غور کرنے کے لئے اجلاس طلب کیا تھا مگر صبح کو ہی سپریم کورٹ لاہور رجسٹری کی انتظامیہ نے بار روم کو تالے لگا کر پولیس کی بھاری نفری تعینات کر دی اور کسی وکیل کو بار کی طرف نہ جانے دیا گیا جس کی وجہ سے بار نے لاہور ہائی کورٹ بار میں اجلاس کیا۔ اس سلسلہ میں جب سپریم کورٹ لاہور رجسٹری کے ایڈیشنل رجسٹرار سے رابطہ کیا گیا تو انہوں نے کہا کہ بار کو تالے نہیں لگائے گئے، بار کے عہدے دار غلط بیانی کر رہے ہیں جبکہ سکیورٹی کے انتظامات ضرور کیے گئے تھے اور وہ معمول کے مطابق ہیں۔ ایڈیشنل رجسٹرار پرویز مہوٹہ نے جنگ کو بتایا کہ سپریم کورٹ بار کے دفاتر، سپریم کورٹ لاہور رجسٹری کی حدود میں واقع ہیں اس لئے سیکورٹی سخت ہونے کی وجہ سے بار روم کو جانے والے راستوں پر بھی سیکورٹی سخت ہے۔ انہوں نے کہا کہ بار روم وکلاء کے کیسوں کی تیاری اور آرام کے لئے ہوتے ہیں، انہیں جلسے جلوسوں اور دیگر سیاسی مقاصد کے لئے استعمال نہیں کیا جا سکتا اور نہ ایسا کرنے کی اجازت دی جا سکتی ہے۔