سکاٹ لینڈ یارڈ کی 5 رکنی ٹیم فورینزک کے ماہرین پر مشتمل ہے



لندن (سٹاف رپورٹر) سکاٹ لینڈ یارڈ کے ماہرین کی جس پانچ رکنی ٹیم نے جمعہ کے روز اسلام آباد میں وزارت داخلہ کے ماہرین سے ملاقات کی ہے وہ فورینزک کے ماہر ہیں اور اس سے قبل انہیں انڈونیشیا کے جزیرہ بالی میں بم دھماکہ کے وقت وہاں بھیجا گیا ان میں سے دو جمیکا میں پاکستان کرکٹ ٹیم کے کوچ باب وولمر کی موت کی تحقیقات میں بھی شامل رہے ہیں۔ ٹیم کی قیادت ایک ماہر مسٹر گرفتھس کر رہا ہے جو ایک اطلاع کے مطابق چند ماہ قبل بھی پاکستان گیا تھا تاہم یہ نہیں بتایا گیا کہ اس کے وہاں جانے کی وجہ کیا تھی۔ ٹیم چاہے گی کہ انہیں ہر قسم کے مواد تک رسائی حاصل ہو۔ ٹیم میں کوئی سینئر سراغرساں یا تحقیقاتی افسر نہیں نہ وہ قتل کی خود تحقیقات کرے گی بلکہ پاکستانی حکام کی معاونت کرے گی۔