2010 : اکتوبر-29
اسلام آباد (مانیٹرنگ ڈیسک)سپریم کورٹ نے گزشتہ دو برس کے دوران معاف کرائے گئے بنک قرضوں کا ریکارڈ طلب کرتے ہوئے تمام بنکوں کومرکزی بنک سے مل کر قرض وصولی کی موثر پالیسی وضع کرنے کی ہدایت کر دی ہے۔ چیف جسٹس نے کہا کہ سیاسی بنیاد پر قرض معافی کو نظرانداز نہیں کیا جاسکتا۔ دوسری جانب سٹیٹ بنک کے گورنر نے سپریم کورٹ سے درخواست کی ہے کہ قرض معافی کے کیس میں جائز اور دانستہ نادہندگی کی وجوہات کو بھی مدنظر رکھا جائے۔چیف جسٹس افتخار محمد چوہدری کی سربراہی میں سپریم کورٹ کے تین رکنی بنچ نے مقدمہ کی سماعت کی تو طلب کردہ50 بڑے نادہندگان میں سے آٹھ کے نمائندے وہاں پیش ہوئے۔ چیف جسٹس نے کہا کہ کسی کاروباری ادارے کا جائز ایشو ہو تو اسے رعایت دی جاسکتی ہے تاہم سیاسی بنیاد پر قرض معافی کو نظرانداز نہیں کیا جاسکتا۔ اُن کا کہنا تھا کہ قرض معافی کا عمل اب بھی جاری ہے جو غیرذمہ داری کا ثبوت ہے۔ اُنہوں نے کہا کہ قرض و صولی کیلئے سٹیٹ بنک پر ذمہ داری عائد ہوتی ہے اس لیے کم از کم اب تو قرض معافی کا عمل روک کر حالیہ قرضوں کی واپسی کو ہی یقینی بنایا جائے۔چیف جسٹس نے سٹیٹ بنک کے وکیل اقبال حیدر کو مخاطب کرتے ہوئے کہا کہ سپریم کورٹ اب انگلی پکڑ کر تو نہیں چلائے گی ۔وکیل اقبال حیدر نے کہا کہ مرکزی بنک کے نئے گورنر قرضوں کی ریکوری کے لئے بہت سنجیدہ ہیں ۔ عدالت میں گورنرسٹیٹ بنک کا خط بھی پیش کیا گیا جس میں کہا گیا تھا کہ کچھ قرض حقیقی اور جائز طور پر معاف ہوئے جبکہ دانستہ نادہندگی کی الگ وجوہات ہیں۔ چیف جسٹس نے ایک قرض معاف کرانے والے کو مخاطب کرتے ہوئے کہا کہ اپنے گھر کا نقصان قوم پر نہیں ڈالنا چاہیے۔عدالتی معاون عبدالحفیظ پیرزادہ نے کہا کہ سٹیٹ بنک نے ڈوبتی معیشت کو سہارا دینے کی خاطر قرض معاف کئے ۔ اُن کا کہنا تھا کہ سپریم کورٹ آخر کتنا بوجھ اٹھائے گی کیونکہ نااہلی تو اداروں کی ہے جو اپنی ذمہ داریاں پوری نہیں کرتے ۔عدالت نے تمام بنکوں کومرکزی بنک سے مل کر قرض وصولی کی موثر پالیسی وضع کرنے کی ہدایت کرتے ہوئے سماعت7 دسمبر تک ملتوی کردی۔ واضح رہے کہ جمعہ کی صبح جب عدالت کی سماعت شروع ہوئی تو چیف جسٹس نے سٹیٹ بینک سے ایک گھنٹے میں قرضوں کی فہرست پیش کرنے کا حکم دیاتھا۔چیف جسٹس نے ریمارکس دیتے ہوئے کہا تھا کہ آئین کے تحت کام کرتے ہوئے ڈر نہیں لگتا کیونکہ آئین میں بڑی طاقت ہے ۔ اُن کا سوال کیا تھا کہ سٹیٹ بینک کیوں ڈر رہا ہے؟

__________________
جاویداسد