اسلام آباد ۔۔۔۔۔۔۔۔ پاکستان ایسوسی ایشن جاپان منتخبہ کے صدر شہزاد علی بہلم نے تمام سیاسی جماعتوں سے اپیل کی ہے کہ وہ ملکی حالات کو بہتر بنانے میں اپنا کردار ادا کریں اور ملکی پالیسیاں اس طرح ترتیب دیں جو دیرپا ہوں کیونکہ حکومت کی پالیسیاں بہت کم مدت میں تبدیل ہوجاتی ہیں جس سے غیر ملکی پاکستانیوں کو سرمایہ کاری میں بہت نقصان اٹھانا پڑتا ہے ان خیالات کا اظہار انہوں نے راولپنڈی اسلام آباد پریس کلب میں ایک ہنگامی پریس کانفرنس سے خطاب کرتے ہوئے کیا انہوں نے کہا ہم حکومت سے درخواست کرتے ہیں کہ وہ دیرپا پالیسیاں تشکیل دے تاکہ بیرون ملک مقیم پاکستانیوں کو سرمایہ کاری میں نقصان نہ اٹھانا پڑے انہوں نے کہا کہ ہم سرمایہ کاری کرتے ہیں اور چند ماہ بعد پتہ چلتا ہے کہ حکومت نے پالیسی بدل دی ہے جس کی وجہ سے ہمیں ہمیشہ نقصان اٹھانا پڑتا ہے انہوں نے محترمہ بھٹو کی شہادت کو بھی پورے ملک کے لئے ایک بڑا دھچکا قرار دیا اور کہا کہ ایسے واقعات سے ملک کی معیشت پر بہت برا اثر پڑتا ہے سمندر پار پاکستانی ملک میں سرمایہ کاری کرنا چاہتے ہیں اور حکومت اس بارے جو اقدامات کررہی ہے ہم ان کو بھی سراہتے ہیں مگر ہم ساتھ ہی یہ مطالبہ بھی کرتے ہیں کہ حکومت اپنی پالیسیاں اس طرح ترتیب دے کہ وہ لمبے عرصے تک قائم رہیں جن سے ہم لوگوں کو سرمایہ کاری میں نقصان نہ اٹھانا پڑے اور ملک میں زیادہ سے زیادہ بیرون ملک سرمایہ کاری ہوسکے انہوں نے حکومت پاکستان سے گوادر میں غیر ملکی پاکستانیوں کیلئے ایک فری زون کا بھی مطالبہ کیا انہوں نے جاپان کے شہر ٹوکیو میں ہونے والے حالیہ سو ملین ڈالرز کے فراڈ کا بھی ذکر کیا جو حکومت کی جانب سے ایک جائیداد کی خفیہ سیل کی شکل میں ہوا انہوں نے بتایا کہ یہ وہ جگہ تھی جو آغا خان نے حکومت پاکستان کو ڈونیٹ کی تھی اور مارکیٹ میں اس کی قیمت سو ملین ڈالرز سے اوپر کی تھی جبکہ حکومت نے یہ جائیداد خفیہ طور پر ساٹھ ملین ڈالرز میں فروخت کرکے ملک کا نقصان کیا۔