سیاسی قیادت کو اب بھی خطرات لاحق ہیں،وزارت داخلہ
اسلام آباد (جنگ نیوز) وزارت داخلہ نے قومی انتخابات کے دن فائرنگ اور تشدد کے واقعات میں 18افراد کی ہلاکت کی تصدیق کرتے ہوئے کہا ہے کہ ان واقعات میں150 افراد زخمی جبکہ100سے زائدافرادکوگرفتار کرکے ان سے بھاری اسلحہ برآمدکیاگیاہے،عام انتخابات کے انعقادکے بعد بھی ملک میں سیاسی قیادت کو سیکورٹی کے خطرات موجود ہیں اور وہ حکومت کی جانب سے جاری سیکیورٹی ہدایات پر عمل در آمد جاری رکھیں جبکہ سیاسی قیادت کو فراہم کی گئی سیکیورٹی برقراررہیگی۔ وزارت داخلہ کے ترجمان اور نیشنل کرائسس مینجمنٹ سیل کے ڈائریکٹر جنرل بریگیڈیئر(ر) جاوید اقبال چیمہ نے ہفتہ وارپریس بریفنگ سے خطاب کرتے ہوئے کہا کہ ملک میں پر امن ماحول میں صاف شفاف انتخابات کرائے گئے اس موقع پر سیکیورٹی کے فول پروف انتظامات کئے گئے اور عوام نے اپنا ووٹ ڈال کر نمائندوں کا انتخاب کیا ،حکومت عوام کی رائے کا احترام کرتی ہے۔ انہوں نے کہا کہ ملک بھر میں پولیس اور سول آرمڈ فورسز کے پانچ لاکھ نفری تعینات کی گئی تھی جبکہ کئی علاقوں میں ایف سی اور رینجرز کو امن و امان کی صور تحال کو بر قرار رکھنے کے پیش نظر ہیلی کاپٹر بھی فراہم کیے گئے تھے۔انہوں نے کہا کہ بنوں میں انتخابی عمل کو سبوتاژ کر نے کی غرض سے موجود دہشتگردوں اور سیکیورٹی فورسزکے درمیان فائرنگ کے تبادلے میں3دہشتگردہلاک اور3گرفتارکرلئے گئے جبکہ ایک اہلکا ر شہید اور دو زخمی ہو ئے۔انہوں نے کہا کہ ملک بھر میں کسی جگہ دہشت گردی کا کوئی واقعہ رونما نہیں ہوا تاہم بعض علاقوں میں سیاسی جماعتوں کے حمایت یافتہ کارکنوں کے درمیان فائرنگ اور تشددکے واقعات رونما ہوئے ہیں،ان واقعات کے دوران 18 افراد ہلاک ہوئے۔ انہوں نے کہا کہ قبائلی علاقوں میں انتخابی عمل پُر امن طریقے سے مکمل کیا گیا۔

__________________