28 اگست 2010 سیالکوٹ(مانیٹرنگ ڈیسک)موضع بٹر میں پولیس کو کوئی کرکٹ گراﺅنڈ نہ ملنے کے باعث سیالکوٹ میں دو بھائیوں کی تشدد سے ہلاکت کا واقعہ ایک معمہ بن گیا ہے اور تحقیقات کے نتیجے میں نئے سوالات نے جنم لیا ہے ۔ ایڈیشنل آئی جی مشتاق سکھیرا کی سربراہی میں قائم کردہ تحقیقاتی کمیٹی کو تحقیقات کے دروان موضع بٹر میں کوئی گراﺅنڈ نہیں ملا جس کا مقتول بھائیوں کے چچا مدعی ضرار بٹ نے اپنی ایف آئی آر میں ذکر کیاتھا تاہم ایک اور علاقہ دبوچی ملیاں کی حدود میں ایک پلاٹ میں کرکٹ گراﺅنڈ ہے لیکن وہاں ڈیڑھ فٹ گہری گھاس اُگی ہوئی ہے اور یہاں مقامی لوگوں کے مطابق گزشتہ آٹھ ماہ سے کوئی کرکٹ میچ نہیں کھیلا گیا۔ موضع بٹر میں سرچ آپریشن کے دوران 79 افراد کی گرفتاریوں کے بعد آدھے سے زیادہ گاﺅں کے گھروں کو تالے لگے ہوئے ہیں اور گاﺅں میں اب صرف خواتین، 14 سال سے کم عمر بچے اور بوڑھے موجود ہیں۔ وقت نیوز کے مطابق ایڈیشنل آئی جی مشتاق احمد سکھیرا کا کہنا ہے کہ اہم شواہد اکٹھے کر لیے گئے ہیں جن کی روشنی میں چالان مکمل کر کے انسداد دہشت گردی کی عدالت میں جمع کروایا جائے گا۔ اُنہوں نے بتایا کہ تحقیقاتی ٹیم نے سانحے کی رپورٹ مکمل کرنے کیلئے واقعے کی فوٹیج سے اہم معلومات حاصل کی ہیں اور ہلاک ہونے والوں دونوں بھائیوں سے برآمد ہونے والا مبینہ اسلحہ اور دیگر سامان قبضے میں لے لیا ہے۔

__________________
جاویداسد