سیدو شریف :بجلی کا ٹرانسفارمر دھماکا خیز مواد سے تباہ
آج ٹی وی رپورٹ
سوات: سیدو شریف ائیرپورٹ کے قریب بجلی کا ٹرانسفارمر دھماکا خیز مواد سے اڑادیا گیا ہے، سوات میں تئیس گھنٹے کی لوڈ شیڈنگ نے عوام کی زندگی اجیرن کردی ہے۔ سیدو شریف ائیرپورٹ کو بجلی فراہم کرنے والے ٹرانسفارمر کو نامعلوم افراد نے دھماکا خیز مواد سے اڑادیا تاہم دھماکے سے ائیرپورٹ کو کسی قسم کا نقصان نہیں پہنچا۔

دوسری جانب امام ڈھیرئی روڈ پر تین مختلف مقامات پر ریموٹ کنٹرول بم نصب کئے گئے ، جنہیں بم ڈسپوزل اسکواڈ نے ناکارہ بنادیا۔گزشتہ روز اغوا ہونے والے نائب ضلعی ناظم ملک صدیق خان کے اغوا کے بارے میں ابھی تک کچھ پتہ نہیں چل سکا اور نہ ہی حکومتی سطح پر ان کی بازیابی کے لئے کوئی اقدامات کئے گئے ہیں۔

سوات میں تئیس گھنٹے کی لوڈ شیڈنگ جاری ہے جس سے عوام کو شدید مشکلات کا سامنا ہے، شہر میں بیشتر فیکٹریاں اور چھوٹی صنعتیں بند ہوگئی ہیں جبکہ یومیہ اجرت پر کام کرنے والے پانچ ہزار سے زائد مزدور بے روزگار ہوگئے ہیں۔