19 ستمبر 2010
ملتان (مانیٹرنگ ڈیسک) وزیر اعظم سید یوسف رضا گیلانی کی ملتان میں واقع رہائش گاہ کے باہر ایک بر روزگار شخص نے خود کو آگ لگا کر خود کشی کی کوشش کی۔ تفصیلات کے مطابق راجن پور کا رہائشی محمد اکرم کا کاروبار اور گھر بار سیلاب کی نذر ہو گیا جس کے باعث وہ اپنے خاندان کی روزمرہ کی ضروریات پوری کرنے سے قاصر تھا ۔ اُس کا کہنا تھا کہ نہ ہی اُسے کوئی امداد ملی ہے اور نہ ہی کوئی اُس کی بات سننے کو تیار ہے۔ عینی شاہدین کے مطابق اکرم نے وزیراعظم ہاﺅس پہنچ کر اپنے لیے مدد کی درخواست وزیراعظم کے کسی بھی عہدیدار کو پہنچانے کی کوشش کی لیکن دروازے پر کھڑے ’سنتریوں ‘ نے اُسے دھکے دیتے ہو ئے نہ صرف تھپڑ رسید کیے بلکہ دھتکارتے ہوئے دروازے سے دور لے جا کر پھینک دیا ۔ پولیس کے اس رویے سے دلبرداشتہ ہو کر اکرم نے اپنے آپ کو احتجاجاً آگ لگا لی۔اکرم کو قریب موجود لوگوں نے بچانے کی کوشش کی لیکن اس کوشش میں اُس کا جسم مزید جھلس گیا۔ جیو اور ایکسپریس نیوز کی ابتدائی معلومات کے مطابق خودسوزی کرنے والا شخص 80فیصد تک جھلس چکاہے اور اُسے تشویشناک حالت میں نشتر ہسپتال منتقل کر دیا گیا ہے۔ ایکسپریس نیوز کے مطابق نشتر ہسپتال کے متعلقہ ڈاکٹروں کا کہنا ہے کہ اس شخص کا بچنا بہت مشکل ہے۔تاہم اے آر وائے نیوز کے مطابق اُس کا جسم ’صرف 40سے 50فیصد ‘تک جھلسا ہے اور اُس کی حالت خطرے سے باہر ہے۔

__________________
جاویداسد