سینیٹ اجلاس:لیفٹیننٹ جنرل مشتاق کی بم دھماکے میں ہلاکت پر اظہار افسوس
اسلام آباد(جنگ نیوز) سینیٹ کا اجلاس سابق سینیٹر سرور کاکڑ، سینیٹر نبی بخش ڈومکی اور سینیٹر صوبیدار خان مندوخیل کی سیاسی خدمات کو خراج عقیدت پیش کرنے کے بعد آج سہ پہر ساڑھے تین بجے تک ملتوی کردیا گیا۔ پیر کو قائد ایوان وسیم سجاد نے تعزیتی قرارداد پیش کی جس میں ان سینیٹروں کی وفات پر گہرے دکھ اور افسوس کا اظہار کیا گیا۔ قرارداد میں راولپنڈی میں گذشتہ روز ہونے والے خود کش حملہ میں جاں بحق ہونے والے آرمی میڈیکل کالج کے پرنسپل لیفٹیننٹ جنرل مشتاق بیگ کی وفات پر بھی گہرے دکھ کا اظہار کیا گیا۔ سینیٹ میں قائد حزب اختلاف رضا ربانی نے سرور کاکڑ اور دیگر سینیٹروں کو خراج عقیدت پیش کرتے ہوئے کہا کہ ان کی خدمات طویل مدت تک یاد رکھی جائیں گی۔ سینیٹ کی قائمہ کمیٹی کے چیئرمین کے طور پر انہوں نے بہترین خدمات انجام دیں۔ انہوں نے کہا کہ میں پورے ایوان کی طرف سے ان سینیٹروں کو خراج عقیدت پیش کرتا ہوں۔ رضا ربانی نے کہا کہ صوبیدار مندوخیل کو بھی ہم بھلا نہیں سکیں گے، ان کی بلوچستان کے عوام کیلئے خدمات اور ایوان کی کارروائی میں شرکت و خدمات یاد رکھی جائیں گی۔ انہوں نے راولپنڈی میں خود کش حملہ میں جاں بحق ہونے والوں کے خاندانوں سے تعزیت کی۔ انہوں نے کہا کہ اس قسم کے واقعات سے 27 دسمبر کی یاد تازہ ہو جاتی ہے جب بے نظیر بھٹو کو شہید کیا گیا۔ انہوں نے کہا کہ یہ ہماری پالیسیوں کا ردعمل ہے اور یہ وقت ہے کہ ہم اس حوالہ سے اپنی پالیسیوں پر نظرثانی کریں، ہمیں اس وقت ایوان کے اندر اور باہر اتفاق رائے کی ضرورت ہے۔ ایوان نے تعزیتی قرارداد کو متفقہ طور پر منظور کر لیا۔

__________________