امریکہ کے خفیہ ادارے سی آئی اے نےنائن الیون کمشن کو القاعدہ کےمشتبہ افراد سے تحقیق سے متعلق مکمل معلومات فراہم نہیں کیں۔
نائن الیون کمشن کے ایک خفیہ ممیو میں کہا گیا ہے کہ فیڈرل انکوئری کمشن نے سی آئی اے کو بارہا القاعدہ ممبران سے تحقیقات کے بارے میں مکمل معلومات مانگیں لیکن وہ معلومات اسے فراہم نہیں کی گئیں۔

کمشن کے سابق ایگزیکٹیو ڈائریکٹر فلپ زیلیکوو نے کہا کہ کمشن نے سی آئی اے سے بارہا وہ ٹیپ مانگیں لیکن اس نے مہیا نہیں کیں۔

امریکی اخبار نیویارک ٹائمز کے رپورٹ کے مطابق کمشن نے سی آئی اے سے القاعدہ ممبران سے تحقیقات سے متعلق وہ ٹیپ مانگیں جو اب سی آئی اے نے ضائع کرنے کا اعتراف کیا ہے۔

سی آئی اے پر الزام ہے کہ اس نے القاعدہ ممبران سے تفتیش کی ان وڈیو ٹیپ کو ضائع کر دیا ہے جن میں وہ تشدد کرتے دکھائے گئے ہیں۔

سی آئی اے نے ان الزامات کی تردید کی ہے کہ اس نے انکوئری کمشن کو ٹیپ نہیں دکھائیں۔ سی آئی اے نے کہا کہ اس سے کوئی ایسا مطالبہ ہی نہیں کیا گیا تھا۔

ان ٹیپس میں تفتیش کے دوران ملزماں کو مبینہ طور پر ’واٹر بورڈنگ‘ کے ذریعے بھی تشدد کا نشانہ بنایا گیا جس میں ملزم کےمنہ پر کپڑا باندھ کر اس کے منہ پر پانی ڈالا جاتا ہے۔