شجاعت کراچی پہنچ گئے ، نائن زیرو اور کنگری ہاؤس جائیں گے

پاکستان مسلم لیگ کے صدر چوہدری شجاعت حسین دو روزہ دورے پر کراچی پہنچ گئے وہ ہفتہ کو متحدہ قومی موومنٹ کے رہنماؤں سے ملاقات کرنے کے لئے ایم کیو ایم کے مرکز ”نائن زیرو“ عزیز آباد اور پاکستان مسلم لیگ (فنکشنل) کے سربراہ پیر پگارا سے ملاقات کرنے کے لئے کنگری ہاؤس جائیں گے۔ پیرپگارا سے ان کی یہ ملاقات طویل عرصے کے بعد ہوگی۔ واضح رہے کہ پیرپگارا ہمیشہ یہ کہتے رہے ہیں کہ چوہدری شجاعت حسین کو جب تک مسلم لیگ کی قیادت سے نہیں ہٹایا جائے گا ، تب تک متحدہ مسلم لیگ کا قیام ممکن نہیں ، لیکن گزشتہ ماہ وزیر اعظم شوکت عزیز کی کنگری ہاؤس میں پیرپگارا سے ملاقات کے بعد پیرپگارا نے کہا تھا کہ اگر چوہدری شجاعت حسین میرے گھر آئے تو میں ان کا دروازے پر استقبال کروں گا۔ وزیر اعظم نے پیرپگارا کے اس بیان کو خوش آئند قرار دیا تھا۔ ذرائع کا کہنا ہے کہ اسلام آباد کے مقتدر حلقوں کی ایما پر پیرپگارا اور چوہدری شجاعت حسین کے درمیان ملاقات ہورہی ہے جس میں پیپلز پارٹی کے خلاف آئندہ عام انتخابات میں مسلم لیگ کو مضبوط کرنے اور مستقبل کی سیاسی حکمت عملی پر غور کیا جائے گا۔ چوہدری شجاعت مسلم لیگ (ق) کے رہنماؤں اور ارکان پارلیمینٹ سے بھی ملاقات کریں گے

بشکریہ
جنگ

__________________