شریف الدین پیر زادہ کی اعلیٰ عدلیہ کے اہم جج سے طویل خفیہ ملاقاتیں
اسلام آباد ( رپورٹ / محمد احمد نورانی ) صدر پرویز مشرف کے اعلیٰ مشیر اور قانونی جادوگر شریف الدین پیرزادہ نے اعلیٰ عدلیہ کے ایک اہم جج سے بدھ اور جمعرات کو ملاقات کر کے چند ” مسائل “ پر تبادلہ خیا ل کیا ہے، اس بات کا انکشاف قابل اعتماد ذرائع نے دی نیوز سے کیا ہے۔ شریف الدین پیرزادہ، جو ملک میں جب بھی سیاسی نظام پٹڑی پر واپس آتا نظر آتا ہے اسے پٹڑی سے اتارنے کیلئے جانے جاتے ہیں، پیرزادہ کو اس بات کا بھی اعزاز حاصل ہے کہ وہ موجودہ کے ساتھ ماضی کے فوجی آمروں کی خدمات انجام دے چکے ہیں اور انہیں ” مہذبانہ “ انداز میں آئین پاکستان کی خلاف ورزی اور اسے ختم کرنے کے ” محفوظ “ طریقے بتاتے تھے۔ متعدد کوششوں کے باوجود یہ نمائندہ دو اعلیٰ قانونی دماغوں کے مابین زیر بحث آنے والی حکمت عملی کی بالکل درست تفصیلات حاصل کرنے میں کامیاب نہیں ہو سکا۔ تاہم ذرائع نے تصدیق کی کہ ملاقاتیں بہت طویل اور مصروفیت سے بھرپور تھیں۔شریف الدین پیرزادہ سے جب اس نمائندے نے رابطہ کیا تو انہوں نے بات نہیں کی اور فون بند کر دیا۔ موجودہ اعلیٰ عدلیہ کے کچھ ارکان نے بھی پیرزادہ کی اعلیٰ عدلیہ کے اہم جج سے طویل اور نجی ملاقات پر تشویش کا اظہار کیا ہے اور ان کا کہنا ہے کہ اعلیٰ عدلیہ کے اہم جج کو یہ زیب نہیں دیتا کہ وہ ایک ایسے شخص کے ساتھ جو ایک کیمپ کے ساتھ سیاسی طور پر وابستہ ہے اس طرح کی ” اہم “ ملاقات اپنے دفتر میں کرے۔

__________________