شریف برادران کیخلاف ریفرنسز پرنیب کو جواب داخل کرانے کی ہدایت



راولپنڈی(جنگ نیوز) راولپنڈی احتساب عدالت نمبر چار کے جج خالد محمود نے سابق وزیراعظم میاں محمد نوازشریف ، شہبازشریف اور شریف فیملی کے دیگر7افراد کیخلاف کرپشن کے تین الگ الگ ریفرنسز کی سماعت کے دوران حکومت سے جواب طلب کیا ہے کہ عدالت کو واضحکیاجائے کہ ا ن ملزمان کیخلاف حکومت مقدمات جاری رکھنا چاہتی ہے کہ نہیں۔ نیب کے پراسیکیوٹر جنرل یاڈپٹی پراسیکیوٹر جنرل اس سلسلے میں تحریری جواب داخل کریں۔ عدالت نے ان ریفرنسز کی مزید سماعت12جنوری تک ملتوی کردی۔ بدھ کو احتساب عدالت نمبرچار کے جج خالد محمود نے میاں محمد نوازشریف ، شہبازشریف اور دیگر فیملی کے 7افراد کیخلاف اربوں روپے مالیتی اتفاق فاؤنڈریز، رائیونڈ اراضی، حدیبیہ پیپرمل ریفرنسز کی باقاعدہ سماعت شروع کی۔ قومی احتساب بیورو کے ڈپٹی پراسیکیوٹر جنرل نیب ذوالفقار احمد بھٹہ پیش ہوئے۔ فاضل جج نے سماعت کے دورا ن کہا کہ قومی احتساب بیورو کے پراسیکیوٹر جنرل نیب خود عدالت میں حاضر ہوں اور بتائیں کہ میاں محمدنوازشریف اور فیملی کے دیگر اراکین کے خلاف کرپشن ریفرنسز کی سماعت مزید جاری رکھنا چاہتی ہے کہ نہیں۔ 12 جنوری کو آئندہ تاریخ کے موقع پر پراسیکیوٹر یا ڈپٹی پراسیکیوٹرسرکار کے موقف سے عدالت کو آگاہ کریں۔