کراچی (اسٹاف رپورٹر) پاکستان کرکٹ بورڈ کا اپیلیٹ ٹریبونل 26 اپریل سے روزانہ فاسٹ بولر شعیب اختر کیس کی سماعت کرے گا۔ لاہور میں جمعرات کو ہونے والے اجلاس میں سماعت کا طریقہٴ کار طے کیا گیا۔ قومی اکیڈمی میں سماعت کے وقت شعیب اختر کے حامیوں کی مختصر تعداد نے ان کے حق میں مظاہرہ کیا۔ پی سی بی نے شعیب اختر پر ڈسپلن کی خلاف ورزی پر پانچ سال کی پابندی عائد کی ہے۔ شعیب نے پابندی کے خلاف اپیل کی ہے لیکن اپیلیٹ ٹریبونل نے شعیب اختر کو ہدایت کی ہے کہ وہ 21 اپریل تک تفصیلی اپیل دائر کر سکتے ہیں۔ شعیب اختر نے اپنے مزاج کے برعکس میڈیا سے گفتگو کرنے سے گریز کیا۔ انہوں نے توقع ظاہر کی کہ مجھے انصاف ملے گا۔ اپیلیٹ ٹریبونل کے سربراہ جسٹس (ر) فرخ آفتاب نے کہاکہ سینیٹ کی قائمہ کمیٹی برائے کھیل نے رولنگ نہ دے کر درست فیصلہ کیا ہے کیونکہ ابھی اس کیس کا فیصلہ ہونا باقی ہے۔ انہوں نے کہاکہ سماعت کے دوران ہم کوئی بیان دے کر کیس پر اثرانداز نہیں ہونا چاہتے البتہ فریقین کے بیانات سے صورتحال خراب ہوئی ہے۔ انہوں نے میڈیا کو کہا کہ میرے منہ میں جملے نہ ڈالیں بلکہ ہمیں اپنا کام کرنے دیں۔ اپیلیٹ ٹریبونل کا پہلا اجلاس جسٹس ریٹائرڈ آفتاب فرخ کی سربراہی میں نیشنل اکیڈمی لاہور میں ہوا جو تقریباً ایک گھنٹہ جاری رہا۔ ٹریبونل کے رکن سلمان تاثیر وقت سے پہلے اجلاس میں پہنچے۔ سابق ٹیسٹ کرکٹر حسیب احسن کراچی سے تاخیر سے پہنچنے کی وجہ سے سب سے آخر میں کارروائی میں شامل ہوئے۔ فاسٹ بولر شعیب اختر کی وکالت عابد حسن منٹو نے کی جب کہ پاکستان کرکٹ بورڈ کی جانب سے تفضل حسین رضوی پیش ہوئے۔ اجلاس کے بعد جسٹس ریٹائرڈ آفتاب فرخ نے بتایا کہ یہ ایک غیررسمی اجلاس تھا جس میں آئندہ کی کارروائی کے لئے طریقہ کار طے کیا گیا ہے۔ شعیب اختر 21 اپریل تک ایڈیشنل گراؤنڈ یا تفصیلی اپیل دائر کرسکتے ہیں۔ پی سی بی23 اپریل تک شعیب اختر کو وہ کاغذات مہیا کرے گا جو انہوں نے پہلے اجلاس میں طلب کئے ہیں۔ جسٹس ریٹائرڈ آفتاب فرخ کا کہنا ہے کہ 26 اپریل سے کارروائی روزانہ کی بنیاد پر ہوگی۔ فریقین کی جانب سے معاملے کو طول دینے کا اشارہ نہیں ملا اس لئے امید ہے کہ اپیلیٹ ٹریبونل اپنی کارروائی جلد مکمل کرلے گا۔ اپیل دائر کرنے کی طرح فاسٹ بولر شعیب اختر کا نیشنل اکیڈمی کے باہر ان کے مداحوں نے بھرپور استقبال کیا۔ شعیب اختر کی آمد سے قبل ان کے مداحوں نے پی سی بی کے خلاف احتجاجی مظاہرہ کیا جس میں انہوں نے شعیب اختر سے پابندی اٹھانے کا مطالبہ کیا اور بورڈ کے خلاف نعرے بازی کی۔

__________________