لاہور ............پاکستان کرکٹ بورڈ کے سربراہ ڈاکٹر نسیم اشرف نے شعیب ملک پر اعتماد کرتے ہوئے انہیں مزید ایک سال کے لیے ٹیسٹ اور ون ڈے ٹیم کا کپتان برقرار رکھنے کا اعلان کیا ہے ،جبکہ تمام کھلاڑیوں پر کالم لکھنے کی پابندی عائد کر دی ہے ۔ قذافی اسٹیڈیم لاہور میں میڈیا کو بریفننگ دیتے ہوئے پی سی بی کے سربراہ نسیم اشرف نے کہا کہ اگر دو تین میچز کے بعد کپتان تبدیل ہوتے رہے تو ٹیم کبھی نہیں بن سکتی ،شعیب ملک آئندہ ایک سال ٹیم کی بدستور قیادت کرتے رہیں گے ،نائب کپتان کا فیصلہ 15 جنوری کو کراچی میں ہونے والے پی سی بی کی گورننگ باڈی کے اجلاس میں کیا جائے گااورنائب کپتان کاتقرر بھی ایک سال کے لیے ہو گا۔ڈاکٹر نسیم اشرف نے کہا کہ کپتان سمیت کسی بھی کھلاڑی کو اخبارات میں کالم لکھنے کی اجازت نہیں ہو گی۔انہوں نے کہا کہ دورہ بھارت میں مصباح الحق بہت اچھا کھیلے، کامران اکمل کی وکٹ کیپنگ اچھی نہیں رہی ،لیکن وہ بیٹنگ میں کام کر گئے ،کھلاڑیوں کی انجریز کے باعث بولنگ کمزور ضرور رہی لیکن بولنگ لائن میں اتنی جان نہیں کہ وہ دو مربتہ کسی ٹیم کو آؤٹ کرسکے ۔انہوں نے کہا کہ بھارت کے خلاف دو ٹیسٹ بچانا اچھی علامت ہے ، البتہ کھلاڑیوں کی مینٹل فٹنس پر کام کرنا ہو گا ،اور اگر کوچ نے ضرورت محسوس کی تو بورڈ ماہر نفسیات بھی مہیا کرے گا،جیف لاسن دو ہفتے کی چھٹی پر ہیں اس کے بعد وہ دورہ بھارت پر اپنی رپورٹ جمع کرائیں گے ،ٹیم منجر طلعت علی سے بھی رپورٹ طلب کی گئی ہے ۔ڈاکٹر نسیم اشرف نے مزید کہا کہ سینٹرل کنٹریکٹ میں شامل کھلاڑیوں کو جنوری میں نئے کنٹریکٹ دیئے جائیں گے لیکن اس کے لیے ڈومیسٹک پرفارمنس بھی لازمی دیکھی جائے گی۔فاسٹ بولر محمد آصف سے متعلق انہوں نے کہا کہ وہ چھ ہفتے میں ٹیم کے لیے دستیاب ہوں گے ،ان کی کامیاب سرجری ہوئی ہے ۔ورلڈ کپ 2011 سے متعلق نسیم اشرف نے کہا کہ میگا ایونٹ کا فارمیٹ انٹرنیشنل کرکٹ کونسل طے کرے گی،جبکہ ایشیا کپ کرکٹ ٹورنامنٹ آئندہ سال جون کے وسط میں شیڈول کے مطابق کراچی میں کھیلا جائے گا۔انہوں نے مزید کہا کے نئے کھلاڑیوں کی تلاش کے لیے تین کیمپس لگائے جائیں گے، وکٹ کیپرز کا کیمپ کراچی میں لگے گا، جس کی نگرانی سابق کپتان راشد لطیف کریں گے ،جبکہ دوسرا کیمپ اوپنرز اور تیسرا فاسٹ بولرز کے لیے لگایا جائے گا ۔انہوں نے کہا کہ کھیل سے بڑا کوئی نہیں کسی بھی کھلاڑی کی جانب سے دوسرے شعبے پر توجہ قابل برداشت نہیں ،شعیب اختر کے لیے بہتر ہے کہ پاکستان آکر ڈومسٹک کرکٹ کھیلیں ۔