سوات (نمائندہ جنگ )شمالی وزیرستان میں سیکورٹی فورسز کے قافلے اور چارسدہ میں تھانے پر ہونیوالے حملوں کے بعدہونے والی جوابی کارروائیوں میں 9شر پسند ہلاک ہو گئے،سوات میں طالبان کیخلاف کریک ڈاؤں جاری ہے اور آپریشن کے دوران فورسز کی جانب سے مشتبہ ٹھکانوں پر شدید گولہ باری کی جا رہی ہے،جبکہ طالبان کے تین ساتھیوں کو گرفتار کر لیا گیا ہے،تفصیلات کے مطابق شمالی وزیرستان میں عسکریت پسندوں نے سیکورٹی فورسز کے قافلے پر حملہ کر دیا ۔ جوابی کارروائی میں 8 عسکریت پسند ہلاک ہوگئے۔ پاک فوج کے ترجمان میجر جنرل وحید ارشد نے میڈیا سے گفتگو کرتے ہوئے کہا کہ ا سپن نون سے جل جانے والے فوجی قافلے پر عسکریت پسندوں نے گھات لگا کر حملہ کر دیا۔ سیکورٹی فورسز نے حملہ آوروں کو گھیرے میں لے کر فائرنگ کی جس سے 8 عسکریت پسند ہلاک ہو گئے جن کی لاشیں ان کے ساتھی لے کر فرار ہو گئے 4 عسکریت پسندوں کو گرفتار کر لیا گیا۔ گرفتار افراد سے راکٹ لانچر اور کلاشنکوفیں برآمد کی گئیں۔ مینگورہ سے نمائندے کے مطابق تحصیل خوازہ خیل کے علاوہ سوات بھر میں صبح سات بجے سے شام چھ بجے تک جبکہ خوازہ خیل میں دن دس بجے سے شام چھ بجے تک کرفیومیں وقفہ رہے گا،جبکہ سوات میں جاری آپریشن میں کوزہ بانڈی کے علاقے میں طالبان کے تین اہم ساتھی گرفتار کر کے نا معلوم مقام پر منتقل کر دیاہے،کئی اہم شخصیات سمیت مزید درجنوں گرفتار ی کے بعد گرفتاری کا سلسلہ وسیع کر دیا گیا ،سیکورٹی فورسز نے مام ڈھیری مرکز پر کنٹرول حاصل کرنے کے بعد دیگر علاقوں کے طرف پیش قدمی کرنے کیلئے منصوبہ بندی مرتب کرلی ، تحصیل کبل اور دیگر علاقوں میں تجارتی سرگرمیاں بدستور معطل ہو گئی ہیں، مٹہ اور خوازہ خیلہ میں پاک فوج کے کنٹرول کے بعد سول آبادی نے شرپسندوں کے گھر گرانے شروع کردیے ہیں جبکہ ضلعی انتظامیہ نے باقاعدگی سے اپنا کام اور پولیس نے فرنٹیئر کور کے ساتھ مل کر علاقے میں چیک پوسٹیں بھی بنانا شروع کردی ہیں ،ضلع چارسدہ کے علاقہ مندنی(ہری چند)میں قائم پولیس چیک پوسٹ پرحملے کے نتیجے میں ایک پولیس اہلکاراورایک حملہ آورجاں بحق جبکہ دودیگرافرادزخمی ہوگئے۔پولیس ذرائع کے مطابق پانچ مسلح افرادنے جمعرات اورجمعہ کی درمیانی رات مذکورہ چیک پوسٹ پرخودکارہتھیارسے اندھادھندفائرنگ کی جس کے جواب میں پولیس چوکی میں موجودپولیس اہلکاروں نے بھی فائرنگ کی ۔فائرنگ کا سلسلہ کچھ دیرتک جاری رہااوراس دوران کانسٹیبل گل زمین شہید جبکہ ہیڈکانسٹیبل مطاہرشاہ اورعزیززخمی ہوگئے۔

__________________