کومت نے دہشت گردی اور شناخت کی چوری جیسے مسائل سے نمٹنے کے لیے نادرا(NADRA) کے ذریعے کمپیوٹر ائزڈ شناختی کارڈ کے کوائف کی موبائیل ایس ایم ایس کے ذریعے تصدیق کی سہولت متعارف کرائی ہے۔ جمعے کے روز نیشنل ڈیٹا بیس رجسٹریشن اتھارٹی NADRAکے دفتر میں اس کا افتتاح کرتے ہوئے وزیرداخلہ رحمن ملک نے کہا کہ حکومت نے معاشرے کو دہشت گردی اور ہرطرح کے جرائم سے پاک بنانے کا عزم کررکھا ہے اور نادرا کی طرف سے جاری کردہ یہ منصوبہ اس سلسلے میں اہم سنگ میل ثابت ہوگا کیونکہ اس سے غیر قانونی سرگرمیوں میں ملوث کسی بھی مشتبہ شخص کے بارے میں پتا چلایا جاسکے گا۔

ادارے کے چیئر مین علی ارشد حکیم نے اس موقع پر بتایا کہ اپنی نوعیت کے اس پہلے پروگرام کے اجرا سے عوام اور قانون نافذ کرنے والے ادارے کسی بھی شخص کا شناختی کارڈ نمبر اپنے موبائیل سے نادرا کے مخصوص نمبروں پر ایس ایم ایس کے ذریعے بھیج کر اس کے کوائف کی تصدیق کرسکتے ہیں۔انھوں نے بتایا کہ قانون نافذ کرنے والے ادارے اور عوام مخصوص نمبروں (7000)اور(7001)پربالترتیب ایس ایم ایس کرکے درکار معلومات حاصل کرسکتے ہیں۔چیئر مین نے کہا کہ یہی معلومات نادرا کی ویب سائیٹ کے ذریعے بھی حاصل کی جاسکیں گی۔

ایس ایم ایس کے جواب میں نادرا کمپیوٹرائزڈ شناختی کارڈ نمبر کے حامل شخص کے بارے میں کوائف فوری طور پر اردو میں یا ضرورت کے مطابق دوسری معلومات بھیجے گا اور اس سہولت کی فیس عوام اور قانون نافذ کرنے والے ادارے کے لیے بالترتیب دس اور پانچ روپے ہوگی۔

خیال رہے کہ سرکاری اعدادوشمار کے مطابق پاکستان کی کل آبادی میں اس وقت سات کروڑ30لاکھ لوگوں کے پاس کمپیوٹرائزڈ شناختی کارڈ ہیں جب کہ اس کے اہل ایک کروڑ 50لاکھ افراد رجسٹرڈ نہیں ہیں جن میں اکثریت خواتین اور دوردراز کے علاقوں میں رہنے والے لوگوں کی ہے۔نادرا نے اگلے سال اگست تک تمام افراد کو کمپیوٹرائزڈ شناختی کارڈجاری کرنے کا ہدف مقرر کررکھا ہے ۔