اداکار سنجے دت کو فلم ’’بلو‘‘کی شوٹنگ کے سلسلہ میں بہماس جانے کیلئے ویزا نہ مل سکا
ممبئی ۔۔۔۔ بالی وڈ اداکار سنجے دت کو فلم ’’بلو‘‘کی شوٹنگ کے سلسلہ میں بہماس جانے کیلئے ویزا نہ مل سکا۔ تفصیل کے مطابق سنجے دت فلم کی شوٹنگ کیلئے بہماس جانا چاہتے تھے اور انہوں نے اپنی درخواست کےساتھ وہ دستاویزات جمع نہ کروائے جس میں انہیں ممبئی دھماکے کیس 1993ء میں خاطی قرار دیئے جانے سے متعلق تھے ۔ سنجے دت نے بہماس کے دورہ کیلئے ٹورسٹ ویزا کے حصول کیلئے درخواست دی تھی ۔
٭٭٭٭٭
اداکار عمران ہاشمی نے ’’جنت ‘‘کی کامیابی کے بعد اپنا معاوضہ 50ملین روپے تک بڑھا دیا
ممبئی ۔۔۔۔ بالی وڈ اداکار عمران ہاشمی نے فلم ’’جنت ‘‘کی کامیابی کے بعد اپنا معاوضہ 15ملین سے 50ملین روپے تک بڑھا دیا۔عمران ہاشمی نے نجی ٹی وی کو بتایا کہ میں نے اپنا معاوضہ بڑھا دیا ہے میں منصفانہ طور پر اب اونچی قیمت مقرر کر سکتا ہوں ۔انہوں نے کہا ہ جس وقت اکشے کمار ‘شاہ رخ خان ‘عامر خان اور سلمان خان شائقین میں مقبول ہو رہے تھے اس وقت بھی میری عوام میں مقبولیت تھی ۔ انہوں نے کہا کہ ’’دی ٹرین ‘‘ گوڈبوائے ‘‘ اور’’آوارہ پن ‘‘جیسی فالتوفلموں کے بعد ’’جنت ‘‘میری پہلی ہٹ فلم ہے ۔ انہوں نے کہا کہ میرا گھر جشن کا منظر دکھائی دیتا ہے میں نے پچھلے ہفتہ تقریبا 15کیک کاٹے ہیں میں نے حال ہی میں ایک نئی بی ایم ڈبلیو خریدی ہے ۔ عمران ہاشمی نے بتایا کہ میں نے اپنا معاوضہ اپنے کرم فرما فلمسازوں مکیش اور مہیش بھٹ کیلئے بھی بڑھا دیا ہے ۔
٭٭٭٭٭
اداکار گووندا اور لارادتہ ہدایتکار دھون کی نئی فلم میں اکٹھے اداکاری کرینگے
ممبئی ۔۔۔۔ بالی وڈ اداکار گووندا اور لارادتہ ہدایتکار ڈیوڈدھون کی نئی فلم میں اکٹھے اداکاری کرینگے ۔ہدایتکار ڈیوڈ دھون کا کہنا ہے کہ ان کی یہ فلم ماضی کی تمام فلموں کی طرح ایک لائٹ کامیڈی اور رومانٹک فلم ہو گی جو پرستاروں کیلئے ایک تحفہ ہو گی ۔فلم کے پروڈیوسر واشو بھاگنانی ہیں ۔فلم میں رتن دیش مکھ بھی اہم کردار ادا کرینگے ۔
٭٭٭٭٭
بہترین اسکرپٹ اور جاندار کردار کی بنیاد پر پشتو فلموں میں کام کی آفر ہوئی تو ضرور کام کرونگی‘صندل
لاہور۔۔۔۔ اداکارہ و ماڈل صندل نے کہا ہے کہ بہترین اسکرپٹ اور جاندار کردار کی بنیاد پر پشتو فلموں میں کام کی آفر ہوئی تو ضرور کام کرونگی۔ان دنوں مختلف چینلز کے ڈراموں اور کمرشلز میں مصروف ہوں ۔خصوصی گفتگو کرتے ہوئے انہوں نے کہا کہ فلم انڈسٹری بحران کا شکار ہے اور چھوٹے اسکرین کے معروف اداکار و اداکارائیں ایسے میں بڑی اسکرین پر آنے کا رسک نہیں لیتی تا ہم یہ بھی ایک حقیقت ہے کہ بحران کے اس دور میں پشتو فلموں نے فلم انڈسٹری کو سہارا دیا ہوا ہے ۔ انہوں نے کہا کہ وہ پشاور میں بھی اسٹیج شوز میں شرکت کرتی رہی ہیں اور پشاور کے لوگوں نے انہیں جو عزت و احترام دیا ہے اسے وہ کبھی بھی نہیں بھول سکتی ۔
٭٭٭٭٭
’’ خوفناک‘‘ فلم انڈسٹری کیلئے سہارا ثابت ہو گی ‘ نئے ہیرو شکیل راجہ
لاہور۔۔۔۔فلم ’’ خوفناک‘‘سے اپنے کیرئیر کا آغاز کرنے والے نئے ہیرو شکیل راجہ نے اس امید کا اظہار کیا ہے کہ انکی 6جون کو ریلیز ہونےوالی فلم انڈسٹری کیلئے سہارا بنے گی ‘ دھڑا دھڑ فلمیں سائن کرنے کی بجائے سوچ سمجھ کر معیاری کردار وں کا انتخاب کروں گا ۔ خصوصی گفتگو کرتے ہوئے شکیل راجہ نے کہا کہ انسان چاہے وہ کسی بھی شعبے میں ہو محنت کرے اللہ تعالیٰ اسے ضرور اسکا پھل دیتے ہیں ‘ میں نے بھی جتنی محنت کی ہے اللہ تعالیٰ مجھے ضرور اسکا پھل دیں گے ۔ انہوںنے کہا کہ مجھے امید ہے کہ یہ فلم ضرور کامیاب ہو گئی اور اس سے فلم انڈسٹری کو بھی سہارا ملے گا ۔شکیل راجہ نے کہا کہ وہ فلم کی نمائش کے بعد فلمی صنعت میں ایک نئے ہیرو کی حیثیت سے بہت جلد اپنی اہمیت منوانے میں کامیاب ہو جائینگے ۔ انہوںنے مزید بتایا کہ وہ نجی سیکٹر میں ٹی وی کے مختلف ڈراموں میں بھی اہم کردار ادا کر رہے ہیں ۔
٭٭٭٭