وفاقی حکومت کی جانب سے کارڈز ملنے کی رفتار اطمینان بخش نہیں ہے: سینئر اہلکار پنجاب حکومت
اسلام آباد (طارق بٹ) وزیراعلیٰ پنجاب میاں شہباز شریف نے سیلاب متاثرین کیلئے وطن کارڈز منگوانے کے لئے گزشتہ دو ہفتے کے دوران اپنا خصوصی طیارہ دو بارکراچی بھجوایا تاکہ مستحقین میں امداد کی بروقت اورتیز رفتار تقسیم جاری رہ سکے۔ پنجاب حکومت کے ایک سینئر اہلکار نے دی نیوز سے گفتگو کرتے ہوئے بتایا کہ جب ہم سیلاب مساثرین میں 20 ہزار فی خاندان امدادی رقم کی تقسیم کیلئے مزید کارڈز طلب کرتے ہیں تو ہمیں بتایا جاتا کہ تمام کارڈ کراچی میں پڑے ہیں اور انہیں یہاں لانے اور پنجاب حکومت کے حوالے کرنے میں خاصا وقت لگے گا۔ اس پر وزیراعلیٰ پنجاب نے فوری طور پر اپنا خصوصی طیارہ کراچی بھجوا دیا تاکہ کارڈز کے حصول اور سیلاب متاثرین میں تقسیم کرنے میں کوئی تاخیر نہ ہو۔ انھوں نے بتایا کہ وطن کارڈز بیرون ملک چھپتے ہیں اور کراچی سے صوبائی حکومتوں کو سپلائی کیلئے جاتے ہیں خصوصی طیارہ بھجوانے سے بہت سا وقت ضائع ہونے سے بچ گیا اور متاثرین کو فوری طور پر امدادی رقوم مل سکیں گی۔ وزیراعلیٰ پنجاب اس سے پہلے بھی کارڈز منگوانے کیلئے اپنا طیارہ کراچی بھجوا چکے ہیں سینئر اہلکار نے مزید کہاکہ وفاقی حکومت کی جانب سے کارڈز ملنے کی رفتار اطمینان بخش نہیں ہے۔ بلاشبہ ان کارڈز کی پرنٹنگ میں وقت لگتا ہے تاہم تمام کارڈز ایک ہی بار چھپوا کر وقت بچایا جا سکتا ہے۔ انھوں نے بتایا کہ پنجاب حکومت اب تک تقریباً ایک لاکھ متاثرہ خاندانوں میں کارڈزتقسیم کر چکی ہے جبکہ متاثرہ خاندانوں کی مجموعی تعداد 8 لاکھ ہے۔ انھوں نے کہا کہ رواں ماہ امدادی رقوم کی تقسیم کا کام مکمل کرلیا جائے گا اہلکار نے کہا ہے کہ کارڈز کی تقسیم میں اب تک پنجاب سے کوئی شکایت موصول نہیں ہوئی تاہم رقوم کی تقسیم کے عمل میں شریک بینک کی گنجائش نے مسئلہ پیدا کیا جس سے نمٹنے کیلئے دوسرے بینک کو بھی اس کام میں شریک کر لیا گیا بلکہ دیگر بینکوں کو بھی اس کام میں شرکت کی دعوت دی گئی ہے۔ ایک اور اہلکار نے بتایا کہ سندھ میں متاثرہ گھرانوں کی تعداد 8 لاکھ تک پہنچ چکی ہے جبکہ خیبر پختونخوا میں امدادی رقوم کی تقسیم کا عمل سست رفتارہے۔ پنجاب حکومت کے ایک اور اہلکار نے دعویٰ کیا کہ منگل کو سیلاب سے متاثرہ علاقوں میں ہاؤسنگ کے حوالے سے جو ڈونرز کانفرنس بلائی گئی تھی وہ مطلوبہ مقاصد کے حصول میں کامیاب رہی ہے۔ پنجاب حکومت چاہتی ہے کہ متاثرہ مکانوں کی تعمیر کا کام جاری رہے تاہم انھوں نے کہا کہ وفاقی حکومت کو ملنے والی غیرملکی امداد میں سے صوبوں کو ایک پائی بھی ادا نہیں کی گئی۔
روزنامہ جنگ راولپنڈی
02-10-10, 04:23 AM
02-10-10, 04:23 AM
Linear Mode
Similar Threads
