چیچہ وطنی: آج نیوز کے مطابق گورنرپنجاب سلمان تاثیر نے کہا ہے کہ وزیراعلٰی پنجاب سیلاب زدہ علاقوں میں ہیلی کاپٹر سے اتر کرموٹرسائیکل پر بیٹھنے کا جو ڈرامہ رچا رہے ہیں اس سے متاثرین کو کوئی فائدہ نہیں پہنچے گا۔ چیچہ وطنی میں میڈیا سے بات چیت کرتے ہوئے گورنر پنجاب نے کہا کہ وہ ہیلی کاپٹر یا گاڑی سے اتر کر گدھا ریڑھی پر نہیں بیٹھ سکتے اور نہ ہی پانی میں چھلانگ لگا سکتے ہیں ایسے ڈرامے صرف ن لیگ کو ہی زیب دیتے ہیں۔

انہوں نے کہا کہ ملکی تاریخ کے بدترین سیلاب نے چاروں صوبوں میں تباہی پھیلا دی ہے اور نقصانات کا صحیح اندازہ پانی اترنے کے بعد ہی لگایا جا سکے گا۔ ان کا کہنا تھا کہ پنجاب میں سستی روٹی اسکیم ناکام ہو چکی ہے یہ صرف شہری آبادی کے لئے تھی۔گورنر پنجاب سلمان تاثیر نے کہا ہے کہ صوبوں کے پاس وافر فنڈز موجود ہیں اگر سیلاب زدگان کے لئے مزید فنڈز کی ضرورت پڑی تو وفاقی حکومت تعاون کرے گی۔ ان کا کہنا تھا کہ صدر زرداری کا دورہ برطانیہ انتہائی کامیاب رہا جس کا مقصد سیلاب زدگان کے لئے فنڈز اکٹھے کرنا تھا۔

__________________
جاویداسد