شہدادکوٹ :راکٹ حملے میں ایس ایچ او سمیت 6 پولیس اہلکار جاں بحق
شہدادکوٹ...شہدادکوٹ کے قریب پولیس چوکی پر راکٹ حملے میں ایس ایچ او سمیت چھ پولیس اہلکار جاں بحق جبکہ ڈی ایس پی سمیت پانچ اہلکارزخمی ہوگئے ،جوابی کارروائی میں چھ حملہ آوربھی مارے گئے ۔ذرائع کے مطابق شہداد کوٹ کے قریب نور پور چوکی کے قیام پر جمالی قبیلے کے افراد نے احتجاج کیا،اس دوران کشیدگی بڑ ھ گئی اور مسلح افراد نے پولیس چوکی پر راکٹوں اور خودکارہتھیاروں سے حملہ کردیا۔حملے کے نتیجے میں پانچ پولیس اہلکار جاں بحق جبکہ ڈی ایس پی شہداد کوٹ عباس گاڈہی اور دو ایس ایچ اوز سمیت چار اہلکار زخمی ہوگئے ۔ جن میں سے تھانہ چوکی جمالی کے ایس ایچ او محبت خان رند کو شدید زخمی حالت میں تعلقہ اسپتال شہداد کوٹ منتقل کردیا گیا تاہم وہ زخموں کی تاب نہ ہوئے جاں بحق ہوگئے۔واقعے کے بعد جوابی کارروائی میں سردار صلاح شاہلیانی جمالی کے بیٹے اکبر جمالی اور اس کے پانچ محافظ مارے گئے ۔اکبر شاہلیانی اور اس کے پانچ محافظوں کی ہلاکت کے بعد جمالی قبیلے کے افراد نے زخمی ڈی ایس پی سمیت پولیس پارٹی کو یرغمال بنالیا تاہم ڈی ایس پی ان کے چنگل سے نکلنے میں کامیاب ہو گئے۔واقعے کے بعد لاڑکانہ سمیت قریبی اضلاع سے بھی پولیس اور رینجرز کو طلب کرلیا گیاہے۔تصادم کے بعد علاقے میں سخت کشیدگی پائی جاتی ہے۔