اسلام آباد (نمائندہ جنگ) پاکستان ٹیلی کمیونیکیشن اتھارٹی (پی ٹی اے) نے پی ٹی سی ایل کو ہدایات جاری کی ہیں کہ وہ مستقبل میں صارفین کی اجازت کے بغیر کسی بھی پیکج کو نافذ نہ کرے اور نہ ہی اتھارٹی سے پیشگی اجازت کے بغیر کسی بھی ٹیرف پیکج کو متعارف کرائے۔ یہ ہدایات پی ٹی سی ایل کی طرف سے یکم دسمبر 2007کو ”پاکستان پیکج“ کے اعلان کے تناظر میں جاری کی گئی ہیں جس میں تمام پی ٹی سی ایل نمبروں پر اس پیکج کو 199 روپے ماہانہ کے چارجز پر از خود شروع کردیا گیا ہے۔ صارفین کی شکایات پر نوٹس لیتے ہوئے پی ٹی اے نے پی ٹی سی ایل کو ہدایات جاری کی ہیں کہ جن صارفین نے اس پیکج کو نہیں اپنایا اور جن کا ماہانہ این ڈبلیو ڈی بل 200روپے سے کم ہوگا۔ متعلقہ مہینوں میں ان سے 199 روپے چارج نہیں کئے جائیں گے۔ علاوہ ازیں مذکورہ پیکج کا دورانیہ بھی کم کرکے 60دن کرنے اور اس میں مزید توسیع نہ کرنے کی ہدایات بھی جاری کی گئی ہیں۔ پی ٹی سی ایل کے اعلان کے مطابق یہ پیشکش محدود مدت تک کیلئے تھی اور قابل توسیع تھی جبکہ مدت اب 2ماہ کردی گئی ہے۔ اتھارٹی نے پی ٹی سی ایل کو مستقبل میں پی ٹی اے کی پیشگی منظوری کے بغیر کسی بھی پروموشن یا ٹیرف پیکج کا اجرا/اعلان نہ کرنے کی ہدایت کی ہے اور آئندہ پیکج /پیکجز کی مکمل تفصیلات دس دن پہلے پی ٹی اے کو فراہم کی جائیں گی۔ پی ٹی سی ایل کو صارفین کی منظوری کے بغیر آئندہ ایسے پیکجز کی پری ایکٹیویشن سے بھی روک دیا گیا ہے۔ قبل ازیں وائرلیس لوکل لوپ کمپنیوں نے پی ٹی سی ایل کے نئے پیکج پر اعتراضات داخل کئے تھے جس کی سماعت کے بعد پی ٹی اے نے پی ٹی سی ایل کو پابند کیا ہے۔

__________________