صبر کا پیمانہ لبریز ہو رہا ہے، پاکستانی وزارت خارجہ ڈیوس کی رہائی کیلئے جلد سرٹیفکیٹ دے، امریکی وزیر خارجہ

اسلام آباد (ماریانہ بابر) واشنگٹن کے صبر کا پیمانہ لبریز ہو رہا ہے اور یہ بات مختصراً امریکی وزیر خارجہ ہلیری کلنٹن نے فون کر کے صدر آصف علی زرداری تک پہنچا دی ہے جس میں انہوں نے امریکی شہری ریمنڈ ڈیوس کی غیرقانونی حراست کا معاملہ اٹھایا۔ 18ویں ترمیم کے بعد جسکے تحت وزیراعظم بااختیار ہو چکے ہیں پھر بھی شاید امریکی دفتر خارجہ وزیراعظم آفس کا فون نمبر حاصل نہیں کر سکا اور صدر کو فون کیا گیا۔ ریمنڈ ڈیوس کیس کے حوالے سے یہ دونوں ملکوں کے درمیان اعلیٰ ترین سطح کا رابطہ تھا جس میں زرداری حکومت نے یہ موقف اختیار کیا کہ معاملہ عدالت میں زیر سماعت ہے۔ اسلئے ہمیں ڈیوس کی قسمت کے فیصلے کیلئے انتظار اور اس کا احترام کرنا چاہئے۔ واشنگٹن پاکستان کے اس موقف کو تسلیم کرنے کیلئے تیار نہیں۔ صدر زرداری کو واضح طور پر بتا دیا گیا ہے کہ انکی حکومت کے پاس اسکے سوا کوئی چارہ نہیں کہ ریمنڈ ڈیوس کی سفارتی حیثیت کو بین الاقوامی اور پاکستانی قوانین کے تحت تسلیم کرتے ہوئے اسے سفارتی استثنیٰ دیکر فوری طور پر رہا کر دیا جائے۔ امریکی شہری کو مسلسل زیرحراست رکھنا بین الاقوامی قانون کی سنگین خلاف ورزی ہے۔ادھر صدارتی ترجمان نے صدر زرداری اور ہلیری کلنٹن کے درمیان ٹیلیفونک گفتگو کی تصدیق سے ہچکچاتے ہوئے کہا کہ میں تصدیق نہیں کر سکتا کہ اس مسئلے پر امریکی وزیر خارجہ نے کب اور کہاں صدر سے بات چیت کی۔

__________________

اندازِ بیاں گرچہ بہت شوخ نہیں ہے
شاید کہ اتر جائے ترے دل میں مری بات