صحافیوں پر حملے کے ملزمان کی گرفتاری یقینی بنائی جائے، دیوان یوسف



کراچی (جنگ نیوز) صوبائی وزیر اطلاعات و خزانہ دیوان محمد یوسف اور سیکریٹری اطلاعات فصیح الدین خان نے کے ٹی این کے چیف ایگزیکٹو اور روزنامہ ”کاوش“ کے ایڈیٹر علی قاضی اور روزنامہ کاوش کے سینئر رپورٹر ناز سہتو پر حیدر آباد سے نوڈیرو جاتے ہوئے ان کی کار پر ملزمان کی فائرنگ کی شدید الفاظ میں مذمت کی ہے۔ سندھ کے وزیرا طلاعات و خزانہ نے مذکورہ حادثہ کا سختی سے نوٹس لیتے ہوئے متعلقہ افسران کو ہدایت دی ہے کہ وہ جلد از جلد معاملہ کی تفتیش کر کے سینئر صحافیوں پر حملہ میں ملوث ملزمان کا سراغ لگائیں اور ملزمان کی گرفتاری میں کسی قسم کی کسر نہ چھوڑی جائے۔ حیدرآباد سے بیورو رپورٹ کے مطابق نجی سندھی چینل کے چیف ایگزیکٹو قاضی علی اور سینئر صحافی ناز سہتو پر کئے جانے والے قاتلانہ حملے کے خلاف مذکورہ چینل اور اخبار کے نیوز ایڈیٹر زاہد ملک کی قیادت میں سب ایڈیٹرز، رپورٹرز، کمپیوٹر آپریٹرز اور دیگر کارکنوں کی بڑی تعداد نے احتجاجی مظاہرہ کیا اور مطالبہ کیا کہ قاضی علی اور ناز سہتو پر حملہ کرنے والے ملزمان کو فوراً گرفتار کر کے قرار واقعی سزا دی جائے۔