صحافیوں کے تحفظ اور آزادیٴ صحافت کیلئے قانون سازی کرینگے ‘شازیہ مری
کراچی(جنگ نیوز ) صوبائی وزیر اطلاعات شازیہ مری نے کہا کہ حکومت صحافیوں کے تحفظ اور آزادیٴ صحافت کیلئے قانون سازی کرے گی تاکہ صحافیوں کو آئین میں دیے گئے حقوق مل سکیں اور انہیں اپنے فرائض کی ادائیگی کیلئے آزادانہ ماحول میسر آسکے۔ ان خیالات کا اظہار انہوں نے جمعرات کو” اے پی پی“ کو انٹرویو دیتے ہوئے کیا۔ انہوں نے کہا کہ ہم آزادیٴ صحافت کیلئے پریس کی جدوجہد میں ان کے ساتھ ہیں۔جبکہ ماضی میں آزادیٴ صحافت کے حوالے سے کی جانے والی قانون سازی میں متعلقہ فریقین کی مشاورت شامل نہیں کی گئی تاہم پیپلزپارٹی کی حکومت متعلقہ فریقین کی مشاورت کے بغیر کوئی قانون سازی نہیں کرے گی۔ انہوں نے کہا کہ ماضی میں صحافیوں سے ساتھ ہونے والی زیادتیوں کی مذمت کرتے ہیں اور یقین دلاتے ہیں کہ موجودہ حکومت کے اقدامات سے صحافی برادری مطمئن ہوگی۔ صوبائی وزیراطلاعات نے کہا کہ حکومت صحافیوں کو مکمل تحفظ فراہم کرے گی تاکہ وہ آزادنہ ماحول میں غیر جانبدار رپورٹنگ کرسکیں اور توقع ہے کہ صحافی برادری بھی اپنی ذمہ داریوں کا احساس کرتے ہوئے ضابطہٴ اخلاق کی پابندی کرے گی۔ انہوں نے کہا کہ سندھ میں بلا امتیاز نوجوانوں کو روزگار فراہم کیا جائے گا اور محترمہ بینظیر بھٹو شہید کے مشن کو پورا کیا جائے گا۔جبکہ پاکستان پیپلزپارٹی عوام کی خدمت کا مشن جاری رکھے گی۔

__________________