صدر بش کا فون،پرویز مشرف کی حمایت جاری رکھنے کا اعلان




اسلام آباد (نمائندگان جنگ) امریکی صدر جارج ڈبلیو بش نے صدر پرویز مشرف کو ٹیلی فون کرکے اپنی حمایت جاری رکھنے کا اعادہ کیا ہے اور کہا ہے کہ امریکا، پاکستان کی حمایت جاری رکھے گا۔ ذرائع کے مطابق صدر بش نے امید ظاہر کی کہ صدر مشرف پاک، امریکا تعلقات بہتر بنانے میں اپنا کردارادا کرتے رہیں گے۔انہوں نے کہا کہ ہم نئی پاکستانی حکومت کے ساتھ تعاون کو فروغ دینگے اور ہم جمہوریت کی مضبوطی چاہتے ہیں۔ امریکی صدر نے دہشت گردی کے خلاف جنگ اور پاکستان کی موجودہ صورتحال پر تبادلہ خیال کیا۔دوسری جانب صدر پرویز نے کہا کہ استعفیٰ دے رہا ہوں اور نہ ہی کہیں جا رہاہوں ،فرائض انجام دیتا رہوں گا،نثار میمن کے دیئے گئے عشائیے میں انہوں نے کہا کہ افواہوں کا مرکز لاہور ہے ، مخصوص سیاسی پارٹی لوگوں کو اشتعال دلا رہی ہے،انہوں نے مزید کہا کہ چاہتا ہوں حکومت مدت پوری کرے۔ تفصیلات کے مطابق وائٹ ہاؤس کی ترجمان ڈینا پرینو نے کہا ہے کہ امریکا پاکستان کی حمایت جاری رکھے گا۔ ذرائع کے مطابق ٹیلی فونک رابطے میں پاک امریکا تعلقات اور انتہاپسندی کے خلاف جنگ میں صدر پرویز مشرف کی پالیسیوں پر اعتماد کا اظہار کیا گیا۔ بات چیت میں پاکستان کی سیاسی صورتحال اور اہم عالمی امور بھی زیر غور آئے۔ اس موقع پر دونوں رہنماؤں نے دہشت گردی کے خلاف جنگ اور افغانستان کی صورتحال پر بھی تبادلہ خیال کیا۔ صدر بش نے خطے سے انتہا پسندی کے خاتمے کے سلسلے میں پاکستان کے کردار کو سراہا اور اس سلسلے میں صدر پرویز مشرف کے ساتھ کوششیں جاری رکھنے کے عزم کا اظہار کیا۔ ٹیلی فونک گفتگو کے دوران سربراہان مملکت نے پاکستان کی سیاسی صورتحال پر تبادلہ خیال کیا۔ صدر بش نے کہا کہ امریکا‘ پاکستان میں جمہوریت کی مضبوطی چاہتا ہے اور ہم نئی پاکستانی حکومت کے ساتھ تعاون کو فروغ دیں گے۔ اس دوران دہشت گردی کے خلاف جنگ جاری رکھنے پر بھی تبادلہ خیال کیا گیا۔ صدر بش نے امید ظاہر کی کہ صدر مشرف پاکستان اور امریکا کے درمیان تعلقات بہتر بنانے میں اپنا کردارادا کریں گے۔ ایوان صدر کے ذرائع نے امریکی صدر کی پاکستانی صدر سے ٹیلی فونک گفتگو کی تصدیق کی ہے۔دوسری جانب صدر پرویز نے اپنے استعفے کی خبروں کو بے بنیاد قرار دیتے ہوئے کہا کہ میں استعفیٰ نہیں دے رہا اور اس قسم کی خبروں کا خمیازہ عوام کو بھگتنا پڑتا ہے اور تمام افواہوں کا مرکز لاہور ہے۔سینیٹر نثار میمن کی جانب سے دیئے گئے عشائیے کے موقع پر بات چیت کرتے ہوئے صدر نے کہا کہ لاہور میں ایک مخصوص سیاسی پارٹی لوگوں کو اشتعال دلا رہی ہے،انہوں نے کہا کہ آئین کے مطابق میں اپنے فرائض انجام دوں گا ،انہوں نے واضح کیاکہ میں نے استعفیٰ دیا ہے اور نہ ہی کہیں جا رہا ہوں ،انہوں نے کہا کہ چاہتا ہوں کہ موجودہ حکومت چلے کیو نکہ عوام نے اسے مینڈیٹ دیا ہے ،انہوں نے کہا کہ ملکی معاملات چلانا سیاستدانوں کا کام ہے۔ ملکی معاشی صورتحال پر تشویش کا اظہار کرتے ہوئے صدر نے کہا کہ زرمبادلہ کے ذخائر چند ماہ میں 16 ارب ڈالر سے کم ہوکر 8 ارب ڈالر رہ گئے ہیں۔ غیرملکی سرمایہ کاری رک رہی ہے، حکومت کو صورتحال کے ازالے کیلئے فوری اقدامات کرنا چاہئیں۔ عشائیہ میں مسلم لیگ (ق) اور اپوزیشن کی بعض دیگر جماعتوں کے ارکان بھی شریک ہوئے۔

__________________