صدر پرویز اور شجاعت نے اعتراف کیلئے رضامند کیا،مگر مجھے دھوکا دیا گیا،ڈاکٹر قدیر




اسلام آباد ( رپورٹ: … حامد میر) پاکستانی حکام نے ڈاکٹر عبدالقدیر خان کے خلاف تحقیقات مکمل کرلی ہیں اور یہ ثابت ہوگیا ہے کہ جوہری سائنسدان کے القاعدہ کے ساتھ کوئی تعلقات نہیں تھے، انہوں نے پاکستان کے جوہری پروگرام سے امریکا کی توجہ ہٹانے کیلئے ایران اور لیبیا کی مدد کی، صدر پرویز مشرف اور چوہدری شجاعت حسین کی جانب سے انہیں قومی ٹی وی چینل پر اعتراف کرنے کے لئے راضی کرنے کے معاملے میں ان کے ساتھ دھوکا کیا گیا۔ انتہائی مصدقہ حکومتی ذرائع نے ان سے خفیہ ایٹمی راز فروخت کرنے کا اعتراف زبردستی کرایا گیا تھا، انہوں نے کہا کہ میں حکومت کی نہیں بلکہ فوج کی تحویل میں ہوں مجھ پر کسی بھی قسم کا مقدمہ درج نہیں او ر ابھی تک یہ بات سمجھ میں نہیں آئی کہ میں کس قانون کے مطابق نظر بند ہوں علاوہ ازیں ایک برطانوی اخبار سے گفتگو کرتے ہوئے ڈاکٹر عبدالقدیرخان نے کہا کہ صدر پرویز نے 2004 مارچ میں ملاقات میں اعتراف کرنے پر آزادانہ گھومنے پھرنے کی یقین دہانی کرائی تھی،لیکن میری آزادی سلب کی گئی اس وقت چوہدری شجاعت حسین نے بھی کہا تھا کہ آپ اعترافی بیان دے دیں جبکہ ایس ایم ظفر نے کہا تھا کہ ایسا کوئی بیان نہ دیں یہ آپ کے لئے مشکل پیدا کرے گا۔ تحقیقات کے دوران جسمانی تشدد نہیں ہوا تاہم ان کے اہل خانہ اور ان سے بدتمیزی ضرور کی گئی تھی،انہوں نے کہا کہ اب انہیں لگتا ہے کہ اعتراف کرنا ان کی غلطی تھی اور اس پر انہیں افسوس ہے،انہوں نے کہا کہ مجھے لکھا ہوا بیان نہیں پڑھنا چاہیے تھا بلکہ اسے اپنے الفاظ میں تبدیل کرنا چاہیے تھااور اپنے کردار کی توضیح کرنا چاہیے تھی، چار سالہ نظر بندی میں قاضی حسین احمد ‘ میاں نواز شریف اور دیگر سیاسی رہنماؤں نے ہمدردی کے پیغامات بھیجے۔ برطانوی اخبار سے گفتگو کرتے ہوئے ڈاکٹر عبدالقدیر نے اس سوال کا جواب دینے سے انکار کیا کہ انہیں ایٹمی تجارت میں ملوث پاکستانی جرنیلوں کی جگہ قربانی دینا پڑی۔انہوں نے کہا کہ وہ اس موضوع پر کچھ نہیں کہنا چاہتے انہوں نے کہا کہ ایران اور شمالی کوریا کی ایٹمی ٹیکنالوجی مغرب میں کھلے عام میسر ہے ۔

__________________