پیرس(رضا چوہدری…نمائندہ جنگ) واشنگٹن اور لندن ہمیشہ صدر جنرل پرویزمشرف کی دہشت گردی خلاف جنگ کے نام پران کی حمایت کرتے رہے ہیں قطع نظر اسکے کہ موجودہ دورمیں پاکستان دنیا میں ایک انتہائی خطرناک ملک ہے اور وہ جوہری طاقت بھی ہے نیز دہشت گردی کے خلاف جنرل پرویز مشرف کے اہم کردار کے باجود مغرب کو اب صدر پرویز مشرف کی ضرورت نہیں رہی۔ فرانس کے اخبار کوریئر انٹر نیشنل نے فنانشل ٹائم کے حوالے سے یہ کہا ہے کہ افغان سرحد کے ساتھ پاکستانی علاقوں میں القاعدہ کے سیٹ اپ کے باعث قانون کی عمل داری ختم ہوچکی ہے لیکن اس کے باوجود امریکا اوراس کے اتحادیوں نے صدر پرویز سے کہا ہے کہ جتنا جلد ممکن ہوسکے پاکستان میں انتخابات کرائے جائیں اور جمہوریت بحال کی جائے، صدر پرویز دہشت گردوں، انتہاپسندوں کی بجائے صحافیوں، وکلاء اور سول سو سائٹی کے لوگوں کو گرفتار کر رہے ہیں، جنرل پرویز چاہتے ہیں کہ گذشتہ سالوں کی طرح مغرب آنکھیں بند رکھے جو کہ اب ممکن نہیں۔جنیوا سے اے ایف پی کے مطابق عالمی انسانی حقوق کی تنظیموں نے اقوام متحدہ کی ہیومن رائٹس کونسل سے درخواست کی ہے کہ پاکستان میں نافذ ایمرجینسی کے خلاف دخل اندازی کی جائے۔ انسانی حقوق کے اداروں ایمنسٹی انٹرنیشنل ہیومن رائٹس واچ ، انٹرنیشنل فیڈریشن فار ہیومن رائٹس ، ورلڈ آرگنائزیشن اگینسٹ ٹارچر نے اقوام متحدہ کی ہیومن رائٹس کونسل کو لکھے گئے مشترکہ خط میں کہا ہے کہ وہ اس سلسلے میں پاکستان سے باز پرس کرے۔ دریں اثناء جماعت اسلامی پاکستان کے سیکریٹری اطلاعات امیر العظیم نے الیکٹرانک میڈیا پر حکومت کی طرف سے ناروا پابندیوں ، نجی ٹی وی چینلز کی نشریات کی بندش ، صحافیوں پر تشدد اور گرفتاریوں کی شدید مذمت کی۔ طلبہ اور نوجوانوں کی بڑی تعداد نے پاکستان ٹیلی ویژن لاہور آفس کے باہر احتجاجی مظاہرہ کیا، مظاہرہ ایک بڑے مجمع کی شکل اختیار کرگیا۔ مظاہرین نے پاکستان ٹیلی ویژن کی دیواروں پر بینرز لگادیئے۔ جماعت اسلامی کراچی کے امیر محمد حسین محنتی نے پرائیویٹ چینلز کی بندش، اخبارات کے دفاتر کے محاصرہ اور صحافیوں پر تشدد اور انہیں دھمکی دینے پر اپنی گہری تشویش کا اظہار کرتے ہوئے اسے فسطائی ہتھکنڈا قرار دیا ہے۔ اپنے ایک مذمتی بیان میں انہوں نے کہا کہ ایمرجینسی کے نفاذ کے ساتھ ہی عدلیہ اور میڈیا پر یلغار حکمرانوں کے خوف کی علامت ہے۔ مگر حکمران اپنے ان اوچھے ہتھکنڈوں کے ذریعے میڈیا کی آزادی کو سلب نہیں کرسکتے۔

__________________