ایوان صدر میں اہم ساز و سامان کی پیکنگ شروع ہوگئی ہے۔ ’جنگ‘ کو ذرائع نے بتایا ہے کہ مئی کے آخر یا جون کے شروع میں صدر پرویز اپنا منصب چھوڑنے کا اعلان کرسکتے ہیں۔ ذرائع کا کہنا ہے کہ اس بڑے اقدام سے پہلے ایوان صدر کی جانب سے اسمبلی توڑنے سمیت دیگر کئی اور اقدامات کرکے اہم سیاسی پارٹیوں‘ پاکستان پیپلزپارٹی اور مسلم لیگ (ن) کیلئے مسائل پیدا کرنا بھی متوقع ہے۔ ایوان صدر کی جانب سے اگلے چند دنوں میں سخت اقدامات آنے والے ہیں۔ کہا جارہا ہے کہ ان اقدامات سے ملک کے اندر سیاسی افراتفری پیدا ہوسکتی ہے۔ ذرائع نے یہ بھی بتایا کہ ایوان صدر کی جانب سے ہونے والے متوقع اقدامات کے بعد پی پی پی اور (ن) لیگ اسٹریٹ پاور کے ذریعے ایوان صدر کو ہلانے کی کوشش کریں گے۔