صدر جنرل (ر)‌ پرویز مشرف نے دورہ یورپ پر جانے سے قبل جیو نیوز اور جیو اسپورٹس چینل کو فوری طور پر کھولنے کا حکم دے دیا ہے اور اس حوالے سے پاکستان الیکٹرانک میڈیا ریگولیٹری اتھارٹی یعنی پیمرا مذکورہ چینلز کو کھولنے کا اعلان کر دے گی۔ گزشتہ روز یورپ کے دورے کے پہلے مرحلے میں‌ برسلز روانگی سے قبل صدر مملکت نے جیو ٹی وی کی انتظامیہ کو طلب کرکے ان سے مذاکرات کئے جو کامیاب ثابت ہوئے اور انہوں نے مذکورہ چینلز فوری طور کھولنے کے لیے متعلقہ حکام کو ہدایات جاری کردیں۔

جیو نیوز نے اگست 2002ء میں‌ ٹھیک صبح‌ 10 بجے اپنی نشریات کا آغاز کیا تھا جبکہ باضابطہ طور پر اس چینل نے اپنی نشریات یکم اکتوبر 2002ء کو شروع کیں۔ اس وقت سے لے کر یہ عوام کا مقبول ترین چینل رہا ہے۔ حال ہی میں‌ کئے گئے ایک سروے کے مطابق عوام جیو نیوز کی خبروں پر 68 فیصد جبکہ اے آر وائی اور آج ٹی وی کی خبروں پر 7 فیصد اعتماد کرتے ہیں، تینوں چینلز کی ویوئر شپ کے حوالے سے بھی نتائج کچھ مختلف نہیں‌۔

جیو نیوز کی بندش سے انتظامیہ کو، ایک اندازے کے مطابق 150 سے 200 کروڑ روپے کا نقصان ہوا ہے۔ صرف یہی نہیں، جس وقت جیو نیوز کو بند کیا گیا اس وقت جیو سوپر کو بھی نہیں چھوڑا گیا حالانکہ یہ خبریں‌ نشر کرنے والا نہیں بلکہ مکمل طور پر اسپورٹس چینل تھا۔ جیو سوپر کی نشریات بند ہونے سے قبل اس کی انتظامیہ نے تاریخی پاک بھارت کرکٹ سیریز کے نشریاتی حقوق 15 ملین ڈالرز کے عوض‌ حاصل کرلئے تاہم یہ چینل میچز نشر نہ کرسکا اور ادارے کو اس نقصان کو بھی برداشت کرنا پڑا۔ اس نقصان کے نتیجے میں جیو نیٹ ورک اور جنگ گروپ کے ملازمین کی تنخواہیں بروقت ادا نہ کی جاسکیں جس سے ان کا روزگار خطرے میں پڑ گیا۔