صدر پرویز نے کو کہا وہ کیا ،نئی پاکستانی حکومت امر یکا دوست ہو گی،بش
گھانا،واشنگٹن (جنگ نیوز) امریکی صدرجارج بش نے کہا ہے کہ پاکستان میں انتخابات کا انعقاد جمہوریت کیلئے ایک اہم فتح ہے، صدر پرویزمشرف نے جوکہا وہ کیا جبکہ نئی پاکستانی حکومت امریکا دوست ہوگی۔گھانا میں پریس کانفرنس سے خطاب کرتے ہوئے انہوں نے کہاکہ صدر پرویزمشرف نے ملک سے ایمرجنسی کے خاتمے اورشفاف انتخابات کے انعقاد کے حوالے سے اپنے وعدے پورے کردکھائے ہیں، امید ہے نئی حکومت دہشت گردی کیخلاف ہمارے ساتھ اتحاد برقرا ر رکھے گی۔امریکی صدرنے کہاکہ پاکستان میں انتخابات شفاف اور منصفانہ ہوئے ہیں اوران کا پرامن انعقاد دہشت گردی کیخلاف جنگ میں کامیابی کا ایک حصہ ہے جبکہ وہ پاکستان کی نئی حکومت سے خوشگوار تعلقات کے خواہاں ہیں۔دوسری جانب امریکی محکمہ خارجہ کے ترجمان سین میک کورمیک نے واشنگٹن میں صحافیوں سے گفتگو کرتے ہوئے کہا ہے کہ امریکا نئی پاکستانی حکومت اور صدرپرویز مشرف کے ساتھ دہشتگردی کے خاتمے کیلئے تعاون جاری رکھے گا اور نئی حکومت سے امریکی عوام کے مفادات سے وابستہ امورپر بات چیت کرینگے۔انہوں نے کہاکہ ہماری کمٹمنٹ فرد واحد سے نہیں ،پاکستانی عوام سے ہے اور ہمیں اس بات سے بھی کوئی غرض نہیں کہ پاکستان میں نیا وزیراعظم کون بنے گا۔انہوں نے کہا کہ امریکاکا اہم مفاد یہی ہے کہ پاکستان دہشتگردی اورانتہا پسندی کیخلاف جاری جنگ میں اپنا اہم کردار جاری رکھے اور ہم اس بات کو یقینی بناناچاہتے ہیں۔انہوں نے کہاکہ صاف ، شفاف اورغیرجانبدار انتخابات کے نتیجے میں پاکستان جمہوریت کی راہ پر گامزن ہوگیا ہے۔ علاوہ ازیں برطانیہ کی حکومت نے پاکستان میں 18 فروری کو ہونے والے انتخابات کے نتائج کو دہشت گردی کے خلاف فیصلہ قرار دیتے ہوئے کہا ہے کہ اس سے واضح ہوتا ہے کہ پاکستان کے عوام کسی کو جمہوری عمل کو پٹڑی سے اتارنے اور انتہا پسندی کی اجازت دینے کیلئے تیار نہیں۔

__________________