لاہور (نمائندہ جنگ) صدرجنرل پرویز مشرف کی صدارت میں ہونے والے اعلیٰ سطحی اجلاس میں ملک میں ایمرجنسی کو جاری رکھنے کا اصولی فیصلہ کیا گیا ہے اور امکان ہے کہ ملک میں عام انتخابات کاعمل مکمل ہونے تک ایمرجنسی برقرار رہے گی۔ صدر مملکت نے ایوان صدر میں اٹارنی جنرل پاکستان جسٹس (ر) ملک محمد قیوم ، شریف الدین پیرزادہ اور اپنے قریب ترین ساتھیوں سے ملاقات کی۔ ذرائع کے مطابق اس ملاقات میں سپریم کورٹ کے روبرو صدر کی اہلیت کے کیس اور ملک میں ایمرجنسی اور پی سی او کے خلاف کیس کے مختلف پہلوؤں پر بات چیت کی گئی جبکہ ایجنڈے پر اہم ترین بات ملک میں 3 نومبر کو لگائی جانیوالی ایمرجنسی تھی۔ اجلاس میں ایمرجنسی کو ختم کرنے کے حوالے سے طویل صلاح مشوروں کے بعد ذرائع کے مطابق یہ طے پایا گیا کہ ایمرجنسی کی مدت میں توسیع کی جائے اور توقع ہے کہ عام انتخابات کا عمل مکمل ہونے تک اسے برابر رکھا جا سکتا ہے۔ اس حوالے سے اجلاس میں موجود ملک کے اٹارنی جنرل ملک محمد قیوم سے استفسار کیا گیا تو انہوں نے کہاکہ اجلاس میں ایمرجنسی اٹھانے یا نہ اٹھانے کے حوالے سے بہت سی باتیں ہوئی ہیں۔ تاہم میں فیصلے نہیں بتا سکتا۔ ان سے سوال کیا گیا کہ کیا نئے سال میں بھی ایمرجنسی برقرار رہے گی تو اٹارنی جنرل نے کہا کہ ہو سکتا ہے تاہم میں اس بارے میں کچھ نہیں بتا سکتا۔ ایک دو روز کے اندر دوبارہ اجلاس ہونے والا ہے، جس میں حتمی فیصلہ کیا جائیگا۔

__________________