اسلام آباد۔۔۔۔۔۔۔۔۔۔۔ حزب اختلاف کی جماعتوں نے صدرپرویز مشرف کے اس بیان پر کہ”امریکا امداد نہیں دیتا تو کسی اورکوحلیف بنالے“پرکہا ہے کہ محسوس ہوتا ہے حکمرانوں کے جانے کے دن آ گئے ہیں ۔ان خیالات کا اظہار جمعیت علماء اسلام (ف) کے سربراہ مولانا فضل الرحمٰن، پاکستان مسلم لیگ (ن) کے چیئرمین راجہ ظفرالحق،نائب امیرجماعت اسلامی پاکستان لیاقت بلوچ ، آئی ایس آئی کے سابق سربراہ جنرل حمید گل اور جمعیت علمائے پاکستان کے سینئر نائب صدر ڈاکٹر ابو الخیر محمد زبیر نے اپنے ردعمل میں کیا ہے۔ مولانا فضل الرحمن نے کہاکہ امریکا میں اتنا دم خم نہیں تھا کہ وہ افغانستان پرحملہ کرتا ، ہمارے حکمرانوں کی مدداورتعاون سے امریکاایساکرسکا، حکمرا نو ں نے خودامریکاکوسرپرچڑھنے دیااوراسکی پالیسیوں کو اختیا ر کرنے کی جوغلطیاں کیں ان کی تلافی مستقبل قریب میں بھی ممکن نہیں ہوگی۔آئی ایس آئی کے سابق سربراہ لیفٹیننٹ جنرل (ر) حمید گل نے کہا کہ اتنے سالوں کے بعد اس بیان کی کوئی حیثیت نہیں، ملک پھنستا جا رہا ہے، شکنجہ کس دیا گیا ہے ، ملک و قوم جکڑے جاچکے ہیں اورامریکا کی پالیسیوں کواختیارکرنے سے جو نقصانات پہنچے ہیں ان کی تلافی کیسے ہو گی۔ مسلم لیگ (ن) کے چیئرمین راجہ ظفرالحق نے کہا کہ حکمرانوں نے امریکا کے ساتھ جو معاملات طے کئے قوم کو اس سے بے خبررکھا، ہمیں تومعلوم نہیں ہے کہ انہو ں نے کیا معاملات طے کئے تھے ہمارا مطالبہ ہے کہ امریکا کسی شخصیت کی بجائے ملکوں اورقوموں کے درمیان تعلقات کو اہمیت اورترجیح دے۔ نائب امیرجماعت اسلامی پاکستان لیاقت بلوچ نے کہا کہ امریکی پالیسیوں کو من و عن تسلیم کرکے قومی مفادات کو نقصان پہنچایا گیاامریکی پالیسیوں کی وجہ سے دنیا میں قیام امن کو خطرات لاحق ہیں ، امریکا نے خطے میں اپنے مفادات کے حصول کیلئے جوکچھ کیا اس کیلئے ہمارے حکمرانوں نے امریکا کے ساتھ بھرپورتعاون اور مدد فراہم کی ہمارے حکمرانوں کی مدد کے بغیرامریکا کیلئے افغانستان کے حوالے سے کچھ کرنا اس کے بس میں نہ تھا۔ جمعیت علمائے پاکستان کے سینئر نائب صدرمتحدہ مجلس عمل کے مرکزی رہنما صاحبزادہ ڈاکٹر ابوالخیر محمد زبیر نے کہا کہ کاش کہ حکمران پہلے دن سے پہچان جاتے اورامریکا کے ہرحکم پرعمل نہ کرتے تو آج ملک کا یہ حال نہ ہوتا۔انہو ں نے کہا کہ ہمارا ہمیشہ سے یہ مطالبہ رہاہے کہ پاکستان کی خارجہ پالیسی دوستانہ اور برابری کی بنیادوں پر ہونی چاہئے تاہم حکمرانوں نے اپنے اقتدارکوطول دینے کیلئے دوستانہ اوربرابری کی بنیادوں پر خارجہ پالیسی اپنانے کی بجائے امریکہ کی غلامی کو ترجیح دی جس کا نتیجہ یہ نکلا کہ آج پاکستان دنیا بھر میں تنہا ہو گیا ہے اور دہشتگردوں کی ہٹ لسٹ پر ہے۔