کراچی (اسٹاف رپورٹر/ریاض شاکر) پاکستان کی اعلیٰ عدلیہ کے جج صاحبان نے تقریباً 7 سال بعد 1973ء کے آئین کی پاسداری اور اس کے تحفظ کی قسم اٹھائی ہے۔ 2000ء سے نومبر 2007ء تک پاکستان کی اعلیٰ عدلیہ صدر پرویز مشرف کے جاری کردہ پی سی او کے تحت ہی حلف اٹھائے ہوئے تھی۔ صدر مشرف کے دور میں یہ پہلا موقع ہے کہ اعلیٰ عدلیہ کے ججوں نے اپنے عہدوں کا 3 بار حلف اٹھایا۔ پہلی بار 2000ء میں ججوں نے پی سی او کے تحت حلف اٹھایا ۔ دوسری بار 3 نومبر 2007ء کو ملک میں ایمرجینسی کے نفاذ کے بعدججوں سے پی سی او کے تحت حلف لیا گیا۔ تب چیف جسٹس پاکستان مسٹر جسٹس افتخار محمد چوہدری سمیت اعلیٰ عدلیہ کے 50 سے زیادہ ججوں کو عہدوں سے برطرف کر دیا گیا۔ تیسری مرتبہ گزشتہ روز 15 دسمبر کو ملک کی اعلیٰ عدلیہ کے ججوں سے 1973ء کے آئین کے تحت حلف لیا گیا۔ آئین کے تھرڈ شیڈول میں موجود اعلیٰ عدلیہ کے ججوں نے جو حلف اٹھایا ہے اس کے الفاظ ہیں کہ ”میں اپنے فرائض اپنی انتہائی صلاحیت اور اسلامی جمہوریہ پاکستان کے آئین اور قانون کے مطابق ایمانداری سے سر انجام دوں گا۔

__________________