اسلام آباد (نمائندہ جنگ، ایجنسیاں) سپریم کورٹ کی فل کورٹ نے صدر جنرل پرویز مشرف کی اہلیت کے خلاف دائر آخری آئینی درخواست کو بھی مختصر دلائل سننے کے بعد خارج کردیا۔ کیس کا مختصر فیصلہ آج سنایا جائے گا جبکہ ایمرجنسی کیخلاف دائر آئینی درخواستوں کی سماعت بھی آج پھر ہوگی۔ کیس کی سماعت کے دوران دلائل دیتے ہوئے ملک قیوم نے کہا کہ ایمرجنسی کے بعد سے ملک میں کوئی خود کش دھماکا نہیں ہوا، اور پیرزادہ نے کہا کہ ملک میں 5 ارب ڈالر کی سرمایہ کاری آئی ہے، عدالت نے اٹارنی جنرل کو صدارتی الیکشن کا ریکارڈ پیش کرنے کا حکم دیا ہے، فاضل عدالت صدر جنرل پرویز مشرف کی اہلیت کے خلاف5 آئینی درخواستوں کو قبل ازیں خارج کر چکی ہے۔ کیس کی سماعت چیف جسٹس عبدالحمید ڈوگر کی سربراہی میں پی سی او کے تحت حلف اٹھانے والے جج صاحبان پر مشتمل 10 رکنی بنچ نے کی۔ گزشتہ روز فاضل عدالت نے کیس کی سماعت شروع کی تو اہلیت کیس میں آخری درخواست گزار ہومیو ڈاکٹر ظہور مہدی نے عدالت سے استدعا کی کہ ان کے کیس کی سماعت کو ملتوی کر دیا جائے۔ فاضل عدالت نے سماعت ملتوی کرنے کی استدعا کو منظور نہ کیا اور درخواست گزار کو ہدایت کی وہ دلائل دیں۔ ڈاکٹر ظہور مہدی نے دلائل دیتے ہوئے کہا کہ میرے کاغذات نامزدگی کو اس لئے مسترد کیا گیا کہ ان پر کسی تجویز کنندہ اور تائید کنندہ نے دستخط نہیں کئے جبکہ آئین میں ایسی کوئی پابندی نہیں ہے۔ چیف جسٹس عبدالحمید ڈوگر نے بعدازاں ایمرجنسی کیس کی سماعت کے دوران اٹارنی جنرل ملک قیوم سے کہا کہ آپ صدر کے الیکشن سے متعلق دستاویز جمع کرائیں۔ اٹارنی جنرل نے کہا کہ ہم یہ دستاویزات پہلے ہی جمع کرا چکے ہیں جس میں بتایا گیا ہے کہ صدر جنرل پرویز مشرف کو کتنے ووٹ ملے جس پر چیف جسٹس نے کہاکہ اس کیس کا مختصر فیصلہ جمعہ کو (آج) جاری کر دیں گے۔

__________________