صوبے کی ترقی اور روزگار کے لیے بھرپور اقدامات کیے جائیں، جام یوسف



حب (نامہ نگار) سابق وزیر اعلیٰ بلوچستان واین اے 270 لسبیلہ آواران اور بلوچستان اسمبلی کے حلقہ پی بی 44 بیلہ اوتھل سے مسلم لیگ ق کے امیدوار حاجی محمد یوسف نے کہا ہے کہ اپنے پانچ سالہ دور حکومت میں صوبے کی ترقی کے لیے بھرپور اقدامات کیے اور بیروزگاری ختم کرنے کے لیے سیکڑوں نوجوانوں کو روزگار فراہم کیا۔ ان خیالات کا اظہار انہوں نے حاجی قادر بخش دودا کی دعوت پر دودا گوٹھ اوتھل کے دورے کے موقع پر ایک عوامی اجتماع سے خطاب کرتے ہوئے کیا۔ دودا گوٹھ پہنچنے پر سابق وزیراعلیٰ کا شاندار استقبال کیا گیا انہوں نے کہا کہ بلوچستان کے دیگر اضلاع کی طرح لسبیلہ میں بھی ترقی کا عمل مزید تیز کیا جائے گا دودا برادری نے جس طرح مجھے عزت بخشی ہے وہ قابل تعریف اقدام ہے۔ دودا برادری کو درپیش تمام مسائل ترجیحی بنیادوں پر حل کیا جائے گا وڈیرہ حسن جاموٹ، تولہ رام لاسی، غلام قادر دودا اور عر لاسی سمیت دیگر نے خطاب کیا۔ اس موقع پر دودا گوٹھ کی معتبر شخصیات حاجی قادر بخش دودا اور اللہ بخش دودا نے جام یوسف کو سندھی اجرکیں پہنائیں۔ جلسے میں غلام محمد لاسی، ابراہیم عادل، امام بخش دودا، رمضان دودا، مولا بخش دودا، کونسلر احمد جان دودا، وڈیرہ شفیع انگاریہ، ڈاکٹر دھرم پال لاسی، ستار سوری، عبدالمجید دیرپا، یوسف جاموٹ، صادق آزاد، واحد صابرہ، رمضان شکیب جاموٹ اور نریش کمار بھی موجود تھے۔