افغانستان میں اقوام متحدہ کے سابق خصوصی نمائندے کائی ایدی نے افغان طالبان کے بعض سینئر رہنماؤں کو گرفتار کرنے پر پاکستان پر کڑی تنقید کی ہے اور کہا ہے کہ ان گرفتاریوں کا مقصد افغان طالبان سے مصالحت کی عالمی کوششوں کو روکنا ہے۔ ان کے اس بیان پر فوری طور پر پاکستان کا ردعمل سامنے نہیں آیا ہے۔
بی بی سی کے ساتھ ایک انٹرویو میں ان کا کہنا تھا کہ پاکستان میں ہوئی ان گرفتاریوں سے اقوامِ متحدہ کے طالبان کے ساتھ رابطے کے تمام خفیہ چینلز بند ہوگئے ہیں۔

ناروے سے تعلق رکھنے والے سفارتکار کائی ایدی کو دو سال پہلے افغانستان میں امن و استحکام کے لیے ہو رہی عالمی کوششوں کو مہمیز دینے کے لیے کابل میں تعینات کیا گیا تھا۔

انہوں نے کہا کہ طالبان کے سینئر رہنماؤں سے بات چیت افغان مسئلے کے حل کے لیے ان کی حکمت عملی کا حصہ تھا۔

انہوں نے تسلیم کیا کہ ان کے طالبان رہنماؤں سے خفیہ مذاکرات گزشتہ سال شروع ہوئے تھے۔ ان کے بقول انہوں نے طالبان رہنماؤں سے پہلی بار پچھلے سال موسم بہار میں رابطہ کیا تھا اور اس وقت تک پاکستان نے ملا عبدالغنی برادر سمیت طالبان کے اہم رہنماؤں کو گرفتار نہیں کیا تھا۔ ان کا کہنا ہے کہ ان کے ساتھ بات چیت ٹھیک ٹھاک چل رہی تھی۔


’پاکستان وہ کردار ادا نہیں کر رہا جو اسے کرنا چاہیئے‘
ملا برادر کی گرفتاری کو امریکہ اور پاکستان نے اہم کامیابی قرار دیا تھا لیکن کائی ایدی کے بقول اس سے فریقین کے درمیان اعتماد ٹوٹ گیا ہے۔

انہوں نے کہا کہ ’پاکستان نے وہ کردار ادا نہیں کیا جو اسے کرنا چاہیے تھا۔ انہیں یقیناً اس بارے میں معلومات ہونی چاہیے تھیں۔ میرا نہیں خیال کہ ان لوگوں کی گرفتاری محض ایک اتفاق ہے۔ وہ جانتے تھے کہ یہ لوگ کون ہیں اور وہ کیا کردار ادا کررہے ہیں اور آج نتیجہ آپ کے سامنے ہے۔‘

ان کا یہ بھی کہنا تھا کہ وہ اس بات سے اتفاق نہیں کرتے کہ طالبان کی قیادت کو بات چیت میں دلچسپی نہیں ہے۔

انہوں نے کہا کہ طالبان سے اب بھی رابطے کرنے کے کئی چینلز ہیں جن میں افغان صدر حامد کرزئی کے سینیئر نمائندے بھی شامل ہیں۔

اوسلو کے نواح میں اپنے گھر میں بات کرتے ہوئے انہوں نے چینلز کی تفصیل بتانے سے گریز کیا۔

انہوں نے کہا کہ اب اعتماد کی بحالی میں ہفتوں، مہینوں اور اس سے بھی زیادہ عرصہ لگ سکتا ہے۔

گزشتہ ہفتے پاکستان فوج کے ترجمان میجر جنرل اختر عباس نے ایک انٹرویو میں اس بات کی تردید کی تھی کہ پاکستان نے ان طالبان کے خلاف کارروائی خفیہ مذاکرات روکنے کے لیے کی ہے۔
بی بی سی