طالبان نے چار شخصیات کو مذاکرات کے لئے قابل اعتماد قرار دیدیا

اسلام آباد (رپورٹ: مظہر طفیل) ایک طالبان کمانڈر نے کہا کہ اگر امن مذاکرات میں چار شخصیات شامل ہوں تو کالعدم تحریک طالبان پاکستان یقینا ان کے نقطہ نظر کو اہمیت دے گی۔ افغانستان میں ایک نامعلوم مقام سے ٹیلی فون پر گفتگو کرتے ہوئے طالبان کمانڈر نے کہا کہ افغان طالبان کی رائے میں چار شخصیات آئی ایس آئی کے سابق سربراہ لیفٹیننٹ جنرل (ر) حمید گل، سابق امیر جماعت اسلامی قاضی حسین احمد، جے یو آئی (س) کے سربراہ مولانا سمیع الحق اور سابق گورنر بلوچستان و خیبر پختون خواہ اویس غنی نہایت اہمیت کے حامل اور بااعتماد شخصیات ہیں۔ انہوں نے کہا کہ یہ لوگ ایشوز کو بخوبی جانتے ہیں، اگر بات چیت میں ان کا کوئی کردار ہو تو طالبان کے تمام گروپس ان کے موقف کو اہمیت دیں گے ایک سوال پر مولانا فضل الرحمن کے بارے میں مذکورہ طالبان کمانڈر کا کہنا تھا کہ وہ کبھی حکومت اور کبھی اپوزیشن میں ہوتے ہیں اور ان کا کام صرف سیاست کرنا رہ گیا ہے۔ طالبان کا کوئی بھی رہنما ان پر بھروسہ کرنے کے لئے آمادہ نہیں ہے۔ پاکستان کے اندر بھی ان کے بارے میں تاثر یہی ہے۔ ماضی میں ان پر خودکش حملوں کی ایک وجہ یہ بھی تھی جس میں القاعدہ نہیں، مقامی طالبان ملوث تھے۔
طالبان نے چار شخصیات کو مذاکرات کے لئے قابل اعتماد قرار دیدیا