ظلم کے مرتکب عناصر نئی حکومت کیخلاف سازشوں میں مصروف ہیں، جے یو آئی
کراچی (پ ر) جمعیت علمائے اسلام (س) کے صوبائی امیر مولانا اسعد تھانوی، قاری عبدالمنان انور نقشبندی، مفتی عثمان یار خان، حافظ احمد علی، مولانا اقبال اللہ، مولانا حضرت ولی، مولانا غلام مصطفی فاروقی، قاری عبدالغفور شاکر و دیگر نے گزشتہ دنوں کے واقعات پر افسوس اور مذمت کا اظہار کرتے ہوئے کہا ہے کہ ایک سابق وفاقی وزیر کے ساتھ بدسلوکی پر پورے شہر میں درندگی کا مظاہرہ کرنے والے بربریت کے نتیجے میں زندہ جل جانے والے وکلاء اور بے گناہ افراد کی المناک موت پر کیوں چپ سادھے ہوئے ہیں ان واقعات کی غیرجانبدرانہ تحقیقات ہونی چاہئیں۔ انہوں نے کہا کہ وکلاء اور دیگر بے گناہ افراد کو زندہ جلانے والے انسان کہلوانے کے لائق نہیں ہیں آج لاہور کے ایک واقعے پر کراچی میں ظلم وبربریت کا بازار گرم کیا جا رہا ہے لیکن جامعہ حفصہ اور لال مسجد میں معصوم طالبات اور بے گناہ بچوں کے قتل عام پر ان کے کانوں پر جوں تک نہیں رینگی۔ انہوں نے کہا کہ عوام کا باشعور طبقہ ان عناصر کو اچھی طرح سے جانتا ہے حکومت ان کے ہتھکنڈوں میں نہ آئے یہ عناصر نئی حکومت کے خلاف سازشوں میں مصروف ہیں۔ انہوں نے کہا کہ جمعیت علمائے اسلام (س) نئی حکومت کے ساتھ ہر ممکنہ تعاون کرے گی۔

__________________