جامعہ کراچی نے پاکستان کے وفاقی وزیرِ داخلہ عبد الرحمن ملک کو کراچی میں قیام امن اور دہشت گردی کے خلاف کارہائے نمایاں انجام دینے پر پی ایچ ڈی کی اعزازی ڈگری دی ہے۔

اس سلسلے میں آج گورنر ہاؤس کراچی میں ایک تقریب منعقد کی گئی جس میں جامعہ کراچی کے وائس چانسلر پیرزادہ قاسم نے عبد الرحمن ملک کو یہ اعزازی ڈگری عطا کی۔ اس موقع پر گورنر سندھ اور کراچی یونی ورسٹی کے چانسلر ڈاکٹر عشرت العباد بھی موجود تھے۔

تقریب میں بتایا گیا کہ عبد الرحمن ملک نے مرے کالج سیالکوٹ سے بی اے کرنے کے بعد سنہ انیس سو اکہتر میں جامعہ کراچی سے شماریات میں ایم اے کیا تھا۔

گو یہ پہلا موقع نہیں کہ جامعہ کراچی کی جانب سے کسی سرکاری عہدے دار کو اعزازی ڈگری دی گئی ہو تاہم اساتذہ برادری میں اس پر ملا جلا ردِ عمل سامنے آیا ہے۔

شعبہ ابلاغ عامہ جامعہ کراچی کے پروفیسر ڈاکٹرطاہرمسعود نے بی بی سی کو بتایا کہ جن لوگوں نے اس سے پہلے جامعہ کراچی سے پی ایچ ڈی کی ہے انہیں اس فیصلے سے مایوسی ہوئی ہے کیونکہ عام طور پر بہت ہی مقتدر اور معزز افراد کو اعزازی ڈگری دی جاتی ہے۔ جیسے اس سے پیشتر ادب میں مشتاق احمد یوسفی ، اور سائنس میں ڈاکٹر عبدالقدیر خان کو اعزازی ڈگریز دی گئی ہیں۔

انہوں نےکہا کہ عبد الرحمن ملک کو امن و امان کی بحالی کے سلسلے میں ڈگری دی گئی ہے حالانکہ امن وامان کی صورتِ حال تو سب کہ سامنے ہے اس لیے عبد الرحمن ملک کی خدمات کی نوعیت سمجھ میں نہیں آرہی ہے اور یہی وجہ ہے کہ اساتذہ برادری نے اس فیصلے کا خیر مقدم نہیں کیا کیونکہ یہی سمجھا جارہا ہے کہ یہ ڈگری میرٹ کے بجائے دیگر وجوہات کی بنا پر دی گئی ہے۔

جامعہ کراچی کی سنڈیکیٹ کے منتخب رکن اور شعبہ کیمیا کے پروفیسر ماجد ممتاز نے بتایا کہ گزشتہ سنڈیکیٹ کی معیاد مارچ میں ختم ہوگئی تھی جبکہ اس کے بعد سے نئی منتخب سنڈیکیٹ کی تاحال کوئی میٹنگ نہیں ہوئی اور فی الحال جامعہ کے وائس چانسلر بذاتِ خود سنڈیکیٹ کی جانب سے تمام فیصلوں کی منظوری دے رہے ہیں۔

انہوں نے بتایا کہ اعزازی ڈگری دینا جامعہ کے چانسلر کا استحقاق ہے اور وہ کسی شخص کا معاملہ سنڈیکیٹ میں بھیجتے ہیں مگر کیونکہ اس وقت سنڈیکیٹ موجود نہیں اس لیے وائس چانسلر نے سنڈیکیٹ کی جانب سے اس کی منظوری دے دی۔

انہوں نے کہا کہ پسند نا پسند سب کی اپنی ہوتی ہے کہ کسی شخص کو ڈگری ملنی چاہیے یا نہیں مگر کوڈ بُک میں یہ چانسلر کا اختیار ہے۔

دلچسپ امر یہ ہے کہ جامعہ کراچی کی جانب سے آج تک چھیالیس اعزازی ڈگریز دی گئی ہیں جن میں زیادہ تر ایل ایل ڈی، ڈی لٹ اور ڈی ایس سی کی ہیں۔

جامعہ کی جانب سے یہ دوسری اعزازی پی ایچ ڈی کی ڈگری ہے جو عبد الرحمن ملک کو دی گئی ہے اس سے پہلے انیس سو چھہتر میں یونی ورسٹی آف کولون کے پروفیسر مارلڈوہانس ہاؤمین کو پی ایچ ڈی کی اعزازی ڈگری دی گئی تھی۔

یہ امر بھی قابلِ ذکر ہے کہ جامعہ کراچی کی جانب سے اس سے پہلے بھی سرکاری عہدوں پر براجمان افراد کو اعزازی ڈگریوں سے نوازا جاچکا ہے جن میں انیس سو پچپن میں اس وقت کے گورنر جنرل غلام محمد، انیس سو پچپن ہی میں اس وقت کےوزیرِاعظم محمد علی اور انیس سو باسٹھ میں اس وقت کے صدر ایوب خان کو ڈاکٹریٹ آف لاء یعنی ایل ایل ڈی کی اعزازی ڈگریز دی گئی تھیں۔ جب کہ انیس سو چھیانوے میں پاکستان کی بحریہ کے سربراہ ایڈمرل منصورالحق کو ڈاکٹریٹ آف سائنس کی اعزازی ڈگری دی گئی تھی۔
(بی بی سی)