چیف جسٹس آف پاکستان نے ایک مقدمے کی سماعت کے دوران کہا ہے کہ عدالتی فیصلوں کا احترام نہیں کیا جا رہا اور اگر حکومت چاہتی ہے تو عدالتیں بند کر دیتے ہیں۔ انہوں نے کہا کہ شکایات روز بروز بڑھ رہی ہیں اور عدالتی فیصلوں کا کھلے عام مذاق اڑایا جارہا ہے۔
نہ جانے ہمارے حکمرانوں اور سیاستدانوں کی سمجھ میں یہ بات کیوں نہیں آرہی کہ قومیں ایٹم بموں اور فوجوں سے مضبوط نہیں ہوتیں بلکہ اس وقت طاقت پکڑتی ہیں جب عدالتیں انصاف کر رہی ہوں اور ملک کا ہر شہری بشمول حکمرانوں کے عدلیہ کے ہر فیصلے پر سرتسلیم خم کر رہا ہو' اگر ایسی بات نہ ہوتی تو دوسری جنگ عظیم کے دوران برطانوی وزیراعظم چرچل ہار جیت سے متعلق پوچھے کئے سوال کے جواب میں یہ نہ پوچھتے کہ کیا برطانیہ کی عدالتیں انصاف کر رہی ہیں؟ اس کے بجائے وہ یہ پوچھتے کہ ہماری فوجی پوزیشن کیا ہے اور ہمارے پاس کتنا اسلحہ باقی رہ گیا ہے۔
ہم سمجھتے ہیں کہ ہمارے سیاستدان جس طرح عدالتی فیصلوں پر تبصرے کر رہے اور ان کا مذاق اڑا رہے ہیں اس کے نتیجے میں انہیں بہت برے دن بھی دیکھنا پڑ سکتے ہیں۔ عدالت عظمیٰ بار بار ان لوگوں کو متنبہ کر رہی ہے لیکن ان پر رتی برابر بھی اثر نہیں ہو رہا اور لگتا ہے کہ ان کا یہ غرور اور تکبر اس روز خاک میں مل جائے گا جس روز سارے نظام کی بساط لپیٹ کر رکھ دی جائے گی۔
اگر ہم لوگ عدلیہ کے فیصلوں کا احترام کریں گے تو اس سے نہ صرف ملک اور قوم مضبوط ہوں گے بلکہ پاکستان بین الاقوامی برادری میں اپنی کھوئی ہوئی ساکھ بھی بحال کرنے میں کامیاب ہو جائے گا ورنہ عدم اعتماد کے بین الاقوامی روئیے کی وجہ سے ہم بہت نقصان اٹھائیں گے۔

__________________
جاویداسد