عدالت نے برطرف ٹیچر کو70ہزار پونڈہرجانے کا حقدار قرار دیدیا
لندن (جنگ نیوز)اسلامی سکول پر مذہبی منافرت پھیلانے کا الزام لگانے والے ٹیچر کو 70ہزار پونڈ ہرجانے کا حقدار قرار دیدیا گیا ہے۔ ویٹ فورڈ ایمپلائمنٹ ٹریبونل کے روبرو 58 سالہ مسٹر کک نے مغربی لندن کے ایکٹن میں واقع کنگ فہد اکیڈمی میں پڑھائے جانے والے نصاب کو مذہبی منافرت اور یہودی مخالفت کے پرچار پر مبنی قرار دیا تھا۔ عدالت کے روبرو مسٹرکک نے یہ موقف اختیار کیا کہ امتحانات میں طلبہ کے نقل کرنے پر آواز اٹھانے اور بورڈ کوآگاہ کرنے پر سکول نے اسکے خلاف سختی سے چھان بین شروع کردی تھی۔ اس نے عوامی مفاد کو عزیز رکھتے ہوئے امتحانی خلاف ورزیوں کے خلاف آواز بلند کی جس کی بناء پر اسے نوکری سے برطرف کردیا گیا۔ مسٹر کک نے یہ بھی الزام لگایا کہ اسکے سکول چھوڑنے پر عملے کی جانب سے نصاب کی ایک کتاب بھی دی گئی جس میں سکول کے طلبہ کو مقامی طالب علموں سے تعلقات نہ رکھنے اور نسلی منافرت پر مبنی اسباق شامل تھے۔ انہوں نے سکول اور اس میں پڑھائے جانیوالے نصاب کو نسل پرست قرار دیتے ہوئے ایسے نصاب کی برطانیہ آمد اور یہاں اس کی تعلیم کی اجازت نہ دینے پر زور دیا۔مسٹر کک کے مطابق اس کے ایک ذریعے نے اسے بتایا تھا کہ سکول میں طلبہ کو دی جانے والی تعلیم میں عیسائیوں کو مبینہ طور پر سور قرار دیا جاتا تھا۔ عدالت نے مسٹر کک کی برطرفی کو نا انصافی قرار دیتے ہوئے انہیں آمدنی سے محرومی پر 58 ہزار پونڈ ہرجانہ جبکہ 10 ہزار پانچ سو پونڈ جذبات کو ٹھیس پہنچانے پر ادا کرنے کا حکم دیا جبکہ سکول پر مدعی کیساتھ برطانوی شہریت کی بنیاد پر نسلی امتیاز برتنے کا الزام مسترد کردیا۔ واضح رہے کہ مسٹ کک کنگ فہد اکیڈمی میں 18برس سے طلبہ کو انگلش زبان کی تعلیم دے رہے تھے اور انہیں دسمبر 2006ء میں نوکری سے برطرف کردیا گیا تھا۔ کنگ فہد اکیڈمی نے کسی بھی طرح کی نسلی منافرت کی تعلیم کے الزام کو مسترد کردیا ہے۔

__________________