ڈھاکہ۔۔۔۔۔ بنگلادیش کی عدالت نے اتوار کے روز سابق وزیراعظم شیخ حسینہ واجد پر دھمکی دیکر رقم وصول کرنے کے الزامات کو ختم کرنے سے انکار کردیا ہے۔ میٹرو پولیٹن سیشن کورٹ کے جج عزیزالحق نے کہا کہ عدالتی کاروائی جاری رکھنے کیلئے حسینہ واجد کے خلاف خاصہ مضبوط مقدمہ موجود ہے۔ دوسری جانب حسینہ واجد نے اپنی صفائی میں کہا کہ ان پر لگائے گئے الزامات بے بنیاد اور سیاسی محرکات کی بنیاد پر ہیں اور ان کا مقصد انہیں اس سال کے اواخر میں انتخابات میں حصہ لینے سے روکنا ہے۔ انہوں نے جج پر آزاد نہ ہونے کا الزام لگاتے ہوئے کہا کہ وہ بے قصور ہیں اور یہ مقدمہ ان کے خلاف سازش کا حصہ ہے۔ پراسیکوٹر شریف الدین نے کہا کہ کورٹ نے وہ تمام دستاویزات منظور کرلئے ہیں جو یہ ثابت کرتے ہیں کہ حسینہ واجد‘ ان کی بہن اور کزن نے ایک کاروباری شخصیت سے پاو پلانٹ لگانے کے عوض رقم وصول کی تھی۔